एमाले बाहेकका राजनीतिक दलहरू स्वार्थ केन्द्रित हुनाले तीब्र विकास चुनौतीपूर्ण भयो: ओली

साझा पाना २०८० असोज २५ गते १४:०० मा प्रकाशित

काठमाडौं, २५ असोज । नेकपा (एमाले) का अध्यक्ष केपी शर्मा ओलीले राजनीतिक आन्दोलन २००७ सालदेखि सहमति र सम्झौतामा टुङ्गिँदा राष्ट्रिय आन्दोलनले झड्का खाने गरेको भन्दै अहिले पनि मुलुक अगाडि बढाउने कुरामा धेरै र नयाँ प्रकारका चुनौतीहरू

प्रवासी नेपाली संघ, भारत केन्द्रीय समितिको तेस्रो बैठकको बुधबार पार्टी केन्द्रीय कार्यालय, च्यासलमा उद्घाटन गर्दै अध्यक्ष ओलीले नेकपा (एमाले) ले राष्ट्रिय स्वाभिमान, सार्वभौमसत्ता, स्वतन्त्रता र भौगोलिक अखण्डतालाई अत्यन्त महत्व दिने र छिमेकीको जायज चासोलाई पनि बुझ्ने बताउँदै ओलीले एमाले बाहेकका राजनीतिक दलहरू स्वार्थकेन्द्रित र विदेशीका लागि अनुकूल (कम्फर्टेबल) भइदिने गरेकाले पनि लोकतान्त्रिक गणतन्त्रको सुदृढीकरण गर्दै मुलुकलाई तीब्र विकासमा अगाडि बढाउने कुरा चुनौतीपूर्ण रहेको बताएका हुन् ।

कसैले जातका नाममा पहिचानका कुरा उठाइरहेको, कोही धर्म, भूगोल लगायतका विषय र कतिपयले देश बनाउन राजा चाहियो भन्ने जस्ता आवाज उठाउन थालेका हुँदा त्यस्ता हरेक गलत कुराहरूको ठाउँका ठाउँ खण्डन गर्नुपर्ने स्पष्ट पारे ।

नेपालको राजनीतिक तथा सामाजिक परिवर्तनको आन्दोलनमा प्रवासी नेपालीको योगदान महत्वपूर्ण रहेको भन्दै ओलीले भूमिकाको प्रशंसा गरे । उनले विगतमा राजनीतिक परिवर्तनका लागि योगदान गरेका प्रवासी नेपाली दाजुभाइ दिदीबहिनीले तीब्र विकास र समृद्धिको अबको आन्दोलनमा पनि महत्वपूर्ण भूमिका निर्वाह गर्ने विश्वास व्यक्त गरे ।

अध्यक्ष ओलीले देश सपार्ने र विगार्ने कुरा राजाको हातमा नहुने हुँदा राजतन्त्र चाहियो भन्नुको अर्थ नभएको बताए । ओलीले भने, निरङ्कुश राजतन्त्र सम्भव छैन, सेरेमोनियलले देश बनाउँदैन, कुरा नबुझेका, स्वार्थी, लोभीपापी र चाकरका सन्तानले मात्र राजा चाहियो भनिरहेका छन् ।

क्याटेगोरी : ब्रेकिंग न्युज, राजनीति, समाचार