पेट्रोलियम पदार्थको मूल्य समायोजन गर्न अनेरास्ववियुको माग

साझा पाना २०७९ साउन १८ गते १६:४८ मा प्रकाशित

काठमाण्डौं । नेकपा एमालेको भातृ संगठन अखिल नेपाल राष्ट्रिय स्वतन्त्र विद्यार्थी युनियन अनेरास्ववियुले पेट्रोलियम पदार्थको मूल्य समायोजन गर्न नेपाल आयल निगमलाई खबरदारी गरेको छ ।

बुधबार अनेरास्ववियू बागमती प्रदेश कमिटीले नेपाल आयल निगमको कार्यालय टेकु अगाडि मूल्य समायोजनाको माग गर्दै विरोध प्रदर्शन गरेको हो । भारतबाट मूल्य घटेर आएपनि निगमले मूल्य समायोजन नगरेको भन्दै प्रदर्शन गरेको हो ।

प्रदर्शनमा उत्रिएका विद्यार्थीहरुले ग्यास र पेट्रोलिय पदार्थको मूल्यवृद्धि फिर्ता गर, जनताको चुलो निभाउन पाइदैन परामदेशी सरकार चाहिँदैन, नालायक सरकार राजीनामा दे लेखेका प्लेकार्ड बोकेका थिए । कतिपय प्लेकार्डमा प्रधानमन्त्री शेरबहादुर देउवाको चर्को आलोचना गरिएको थियो ।

विरोध प्रर्दशन गर्दै अनेरास्ववीयूका केन्द्रीय सदस्य विशाल विश्वकर्माले यथाशिघ्र मुल्य समायोजन गर्न निगमलाई आग्रह गरेका छन् । उनले मूल्य समायोजन नभए अनेरास्ववीयू कडा आन्दोलनमा उत्रने चेतावनी पनि दिए ।

“अन्तराष्ट्रिय बजारमा पेट्रोलको मूल्य घटेपनि नेपालमा नघटेको हुनाले यसलाई समायोजन गर्नको लागि हाम्रो आन्दोलन हो । सरकारले दलाली करण भईरहेको छ, हामीले खबरदारी गर्ने कार्यक्रमलाई निरन्तरता दिने छौ ।”

विरोध प्रर्दशन प्रश्चात अनेरास्ववीयूले नेपाल आयल निगमका प्रवक्ता विनितमणि उपाध्यायलाई बिनेल पौडेललाई विज्ञप्ती बुझाएको छ ।

अनेरास्ववीयू बाग्मतीका अध्यक्ष पंकज भण्डारीद्वारा जारी विज्ञप्तिमा भारतीय पेट्रोलियम कर्पोरेसनले पछिल्लो १५ दिनमा दुईपटक गरेर पेट्रोलमा ३२.५६ रुपैयाँ र डिजेलमा २५.१ रुपैया प्रतिलिटर तथा खाना पकाउने एलपी ग्यास ७७ रुपैया प्रति सिलिन्डर मूल्य घटाउदा पनि नेपाल आयल निगमले घाटा पूर्तिको बाहानाबाजी गर्दै मूल्य नघटाएको उल्लेख गरिएको छ ।

त्यसैगरी अन्तर्राष्ट्रिय बजारमा कच्चा तेलको मूल्य निरन्तर घटिरहेको अवस्था पनि आयल निगम जनतालाई महंगीको भारी बोकाउन लागि परेको आरोप लगाइएको छ । अब तत्काल मूल्य नघटाए निर्णायक आन्दोलनमा उत्रने चेतावनी दिइएको छ