बाजुरा । बाजुराको बुढीगंगा नगरपालिकामा मतदान सुरु भएको छ । नगरपालिकाको १० वटै वडाका १० मतदानस्थल तथा १९ मतदान केन्द्रमा पुन मतदान सुरु भएको हो । आज बिहान ७ : ००बजे बाटै सबै मतदान स्थलमा शान्तिपुर्ण वातावरणमा मतदान सुरु भएको प्रमुख निर्वाचन अधिकारी माधव घिमिरेले बताउनु भयो ।

बुढिंगामा १२ हजार ६ सय ५९ मतदाता छन् । बूढीगंगा नगरपालिकाको मेयर पदमा नेपाली कांग्रेसका रंग खाती र एमालेका रामबहादुर बानियाँ उम्मेदवार हुनुहुन्छ ।

यसअघि गत वैशाख ३० को मतदानका क्रममा सुरक्षा व्यवस्था फितलो भएकाले निष्पक्ष र स्वतन्त्र मतदान हुन नसकेपछि  बूढीगंगामा आज पुनः निर्वाचन गरिदै छ । गत वैशाख ३० गते भएको निर्वाचनमा नेपाली कांग्रेस र नेकपा एमालेबीच मतदानमा धाँधली भएको भन्दै विवाद भएपछि मतदान नै स्थगित गरिएको थियो ।

आज भइरहेको मतदानका लागि सबै मतदानस्थलमा सुरक्षा व्यवस्था कडा पारिएको छ ।निर्वाचनमा सेना, सशस्त्र प्रहरी, नेपाल प्रहरी र राष्ट्रिय अनुसन्धानसहितका १ हजार २ सय सुरक्षाकर्मी परिचालन गरिएको छ ।

निर्वाचन आयोगले पुनः निर्वाचन गर्नका लागि नयाँ निर्वाचन अधिकृतको रुपमा लक्ष्मण बहादुर कडायतलाई तोकेको छ । यसैगरी सरकारले पनि पहिलेका प्रमुख जिल्ला अधिकारी उपेन्द्रराज पौडेलको सट्टा प्रकाशचन्द्र अधिकारीलाई बाजुराको प्रमुख जिल्ला अधिकारीको जिम्मेवारी दिइएको छ । नेपाल प्रहरी र सशस्त्र प्रहरीको नेतृत्व पनि सरकारले फेरेको छ।

क्याटेगोरी : राजनीति, समाचार
ट्याग : #breaking, #बुढीगंगा नगरपालिका

---

---

---