काठमाडौँ, फागुन २२ गते । सामाजिक सञ्जाल फेसबुकमार्फत नक्कली आइडी बनाई आर्थिक ठगी गर्ने एक युवकलाई काठमाडौँ प्रहरीले पक्राउ गरेको छ। आरोपीले विदेशमा रहेका व्यक्तिहरूको फोटो प्रयोग गरी नक्कली फेसबुक आइडी बनाउने र उनीहरूको आफन्तसँग रकम ठगी गर्ने कार्य गर्दै आएको प्रहरीले बताएको छ।

 

प्रारम्भिक अनुसन्धानका अनुसार, आरोपीले वैदेशिक रोजगारीमा रहेका व्यक्तिहरूको फेसबुक प्रोफाइल अध्ययन गरी उनीहरूको नाम र फोटो प्रयोग गरेर नक्कली आइडी बनाउँथे। त्यसपछि, ती नक्कली खाताबाट उनीहरूका आफन्तलाई सम्पर्क गरी आफू बिरामी भएको वा अस्पतालमा भर्ना भएको नाटक गर्दै आर्थिक सहयोगको नाममा रकम माग्ने गर्थे।

प्रहरीका अनुसार, आरोपीले पीडितहरूलाई व्यक्तिगत बैंक खाता नभएको भन्दै, आफन्त वा विभिन्न पसलहरूको QR कोड पठाएर रकम जम्मा गर्न अनुरोध गर्ने गर्थे। यसै तरीकाबाट उनले नगद ठगी गर्दै आएको पाइएको छ।

प्रहरी अनुसन्धानका क्रममा ठगीमा संलग्न व्यक्तिको नाम नारायण दत्त खकुराल रहेको खुलेको छ। उनी धादिङ जिल्ला निवासी हुन् र हाल काठमाडौँमा बसोबास गर्दै आएका थिए। काठमाडौँ उपत्यका अपराध अनुसन्धान कार्यालयको टोलीले उनलाई फागुन २० गते तारकेश्वर नगरपालिका-५, लोलाङ हाईट क्षेत्रबाट पक्राउ गरेको हो।

प्रहरीले आरोपीलाई थप अनुसन्धानका लागि फागुन २१ गते काठमाडौँ जिल्ला प्रहरी परिसर, भद्रकाली पठाई आवश्यक कानुनी प्रक्रिया अघि बढाएको जनाएको छ।

क्याटेगोरी : समाचार
ट्याग : #breaking, #तारकेश्वर नगरपालिका-५, #लोलाङ हाईटबाट नारायणदत्त खकुराल पक्राउ

---

---

---