स्वास्थ्य सचिव पोखरेल र अतिरिक्त सचिव सिंह अनिवार्य अवकाशमा, सचिवको दौडमा तीन अतिरिक्त सचिव

काठमाडौं । स्वास्थ्य तथा जनसङ्ख्या मन्त्रालयका सचिव डा.रोशन पोखरेल र मन्त्रालयमै कार्यरत स्वास्थ्यतर्फकै अतिरिक्त सचिव डा.दीपेन्द्ररमण सिंह अनिवार्य अवकाशमा गएका छन् । मन्त्रालयले आइतबार एक समारोहकाबीच सेवा तथा उमेर अवधि पुरा गरेका डा.पोखरेल र डा. सिंहको एकैपटक बिदाइ गरेको हो ।

सचिव पोखरेल २०७८ साउन ४ मा स्वास्थ्य सचिवमा बढुवा भएर नियुक्त भएका थिए । बिदाइ कार्यक्रममा स्वास्थ्य तथा जनसंख्यामन्त्री प्रदीप पौडेल तथा मन्त्रालयका जनसङ्ख्या तर्फका सचिव हरिप्रसाद मैनालीले आगामी दिनको शुभकामना दिँदै बिदाइ गरेका छन् ।

डा.पोखरेल र डा.सिंह २०७६ फागुन १२ मा विशिष्ट श्रेणीको प्रमुख विशेषज्ञ पदमा बढुवा भएका थिए । डा.पोखरेल २०७८ साउन ४ मा सचिवमा नियुक्त भएका थिए । दुवै सचिवको बिदाइ भएसँगै सचिव र अतिरिक्त सचिवको पद रिक्त भएको छ । मन्त्रालयमा कार्यरत अतिरिक्त सचिव डा.सङ्गीता कौशल मिश्र, डा.विकास देवकोटा र डा.टङ्क बाराकोटी प्रतिस्पर्धामा छन् ।

सचिव बढुवाको पहिलो बरीयतामा डा.सङ्गीता कौशल मिश्र रहेकी छन् । उनी मन्त्रालयमै अतिरिक्त सचिवको जिम्मेवारीमा छन् ।

यस्तै दोस्रो बरीयतामा डा.विकास देवकोटा र तेस्रो बरीयतामा डा.टङ्क बाराकोटी छन् । देवकोटा स्वास्थ्य सेवा विभागको महानिर्देशकको जिम्मेवारीमा छन् भने बाराकोटी मन्त्रालयका अतिरिक्त सचिवको जिम्मेवारीमा छन् ।

देवकोटा र बाराकोटी एकैपटक अतिरिक्त सचिव भएका भए पनि डा.मिश्र भने उनीहरु भन्दा करिब १० महिना अघि नै अतिरिक्त सचिवमा बढुवा भएकी थिइन । कौशलसँगै अतिरिक्त सचिवमा बढुवा भएका डा।गुणराज लोहोनी र डा.श्यामसुन्दर यादव ६० वर्षे उमेर हदका कारण अनिवार्य अवकाशमा गइसकेका छन् ।

देवकोटा महानिर्देशक रहेको स्वास्थ्य सेवा विभागको महानिर्देशकको जिम्मेवारी मिश्रले यस अघि एक बर्ष सम्हालिसकेकी छन् । बाराकोटी भने मन्त्रालय अन्तरगतको सबैभन्दा बलियो निकाय विभागमा अहिलेसम्म महानिर्देशक भएका छैनन् ।

मिश्रले यस अघि सहसचिव हुँदा परोपकार तथा प्रसूति अस्पताल थापाथलीको निर्देशक, कोशी प्रादेशिक अस्पतालको निर्देशक भइसकेकी छन् भने सहसचिव हुँदा नै मन्त्रालयमा स्वास्थ्य समन्वय महाशाखा प्रमुखको जिम्मेवारी समेत सम्हालीसकेकी छन् । देवकोटाले पनि उक्त महाशाखाकाको जिम्मेवारी सम्हालेका छन् ।

बाराकोटी लामो समय मेची अस्पतालको निर्देशक भएर काम गरेका थिए । अतिरिक्त सचिवमा बढुवा हुनु अघि देवकोटा लुम्बिनी प्रदेशको स्वास्थ्य मन्त्रालयको सचिव भएका थिए ।