मैले हाच्छ्यूँ गर्दा भेन्टिलेटरको फोटो राख्छन्, उनीहरूको आशा पुग्नेवाला छैन : ओली

साझा पाना २०८१ माघ १४ गते १६:४४ मा प्रकाशित

काठमाडौं । प्रधानमन्त्री केपी शर्मा ओलीले आफूले रुघा लागेर हाच्छ्यूँ गर्दा अक्सिजन लगाएको फोटो सामाजिक सञ्जालमा भाइरल बनाउनेहरूलाई जवाफ फर्काएका छन् ।

केही दिनयता आफ्नो स्वास्थ्यलाई लिएर सामाजिक सञ्जालमा गरिएको विरोध र टिप्पणीलाई लक्षित गर्दै उनले फोटो राख्नेहरूको आशा नपुग्ने बताए ।

सूर्यविनायक नगरपालिकाको प्रशासकीय भवन उद्घाटन समारोहलाई सम्बोधन गर्दै उनले आफूलाई रुघाखोकी लागेकाले सामान्य कमजोर बनाएको बताए ।

उनले भने, ‘मेरो स्वास्थ्य राम्रो छैन । रुघाखोकीले सतायो । तर, मैले हाच्छ्यूँ गरेँ भने आईसीयूको, भेन्टिलेटर लगाएको, अक्सिजनको मास्क लगाएको फोटो आइहाल्छ, तपाईंले पनि देख्नुभयो होला । मलाई रुघा लागेको थियो, अहिले पनि राम्ररी निको भइसकेको छैन । औषधि खाँदा कमजोर बनाएको छ, जे आशले साथीहरूले त्यस्तो फोटो देखाउँछन् त्यो पुग्नेवाला छैन ।’