रविको मुद्दामा सरकारी वकिलको बहस जारी, परिवारको जिम्मा लगाएकोमा न्यायाधीशप्रति असन्तुष्टि

साझा पाना २०८१ माघ १० गते १६:०६ मा प्रकाशित

रूपन्देही । रूपन्देही जिल्ला अदालतमा रास्वपा सभापति तथा पूर्व गृहमन्त्री रविछानेविरूद्वको मुद्दामा सरकारी वकिलको बहस अन्तिम चरणमा पुगेको छ ।

बुटवलको सुप्रिम बचत तथा ऋण सहकारी संस्थाको ठगी र संगठित अपराध अभियोगमा थुनछेक बहस अघि अभियुक्तलाई परिवारको जिम्मा लगाउने विषयमा सरकारी वकिलले प्रश्न उठाएका छन् । यसको जवाफमा लामिछानेका निजी कानुन व्यवसायीले जवाफ दिनेछन् ।

बिहीबार सुरु भएको थुनछेक बहसमा जिल्ला सरकारी वकिल कार्यालयका न्यायाधिवक्ता प्रेमराज पौडेलले अभियुक्त रवि लामिछानेलाई प्रहरी हिरासतमा राख्नुपर्ने तर्क गरेका थिए ।

पौडेलले भने, ‘थुनछेक बहस बिना नै अभियुक्तलाई परिवारको जिम्मा लगाइनु गलत हो। यसले थुनछेक बहसको औचित्यमाथि नै प्रश्न खडा गरेको छ ।’

सरकारी वकिल कार्यालयले रवि लामिछानेसहित २२ जनाविरुद्ध आइतबार मुद्दा दर्ता गरेको थियो। अभियुक्त लामिछाने बुधबार अदालतमा हाजिर भए। ५ नं। इजलासका न्यायाधीश प्रल्हादकुमार योगीले उनको बयान गराई परिवारको जिम्मा लगाएका थिए ।

बिहीबार सरकारी वकिलका तर्फबाट प्रेमराज पौडेलसहित अन्य अधिवक्ताहरूले लामिछानेलाई हिरासतमै राखी थप अनुसन्धान गर्नुपर्ने माग गरेका छन् ।

सरकारी वकिलको तर्फबाट बहस अन्तिम चरणमा पुगेको र यसपछि लामिछानेका पक्षमा कानुन व्यवसायीले बहस गर्नेछन् ।

प्रतिवादीको तर्फबाट सुशील पन्त, सुरेन्द्र थापा, पशुपति भण्डारीसहितका अधिवक्ताहरू बहस गर्ने तयारीमा छन्। बहसपछि पूर्पक्षका लागि थुनामा पठाउने, धरौटीमा रिहा गर्ने वा साधारण तारेखमा छाड्ने विषयमा आदेश आउनेछ ।

सुप्रिम सहकारी ठगी प्रकरणमा लामिछानेसहित २८ जनाविरुद्ध ५५ करोडभन्दा बढी रकम ठगी गरेको आरोप लागेको छ। साथै, लामिछाने र अन्य व्यक्तिहरूबाट व्यक्तिगत रूपमा समेत करोडौं बिगो दाबी गरिएको छ ।

क्याटेगोरी : समाचार
ट्याग : #रविको मुद्दामा सरकारी वकिलको बहस जारी