किशोरीलाई बलात्कार गरेको अभियोगमा बिर्तामोडका पूर्वमेयरलाई थुनामा पठाउन आदेश

साझा पाना २०८१ पुस २३ गते ११:२० मा प्रकाशित

घरमा काम गर्न राखिएकी १६ वर्षीया किशोरीलाई जबर्जस्ती करणी गरेको अभियोगमा बिर्तामोड नगरपालिकाका पूर्वमेयर ध्रुव शिवाकोटी जेल चलान भएका छन् ।

मंसिर २४ मा पक्राउ परेका शिवाकोटी हिजोबाट जेल चलान भएका हुन् । झापा जिल्ला अदालतका न्यायाधीश नवीनकुमार जोशीको इजलासले उनलाई पुर्पक्षका लागि थुनामा पठाउन सोमबार आदेश दिएको श्रेस्तेदार किरणकुमार सिंहले जानकारी दिए ।

पूर्वमेयर शिवाकोटीविरुद्ध पीडितले किटानी जाहेरी दिएकी थिइन् ।

आइतबार शिवाकोटीसँग बयान लिइएको थियो । उनको पक्षमा अशोक पोखरेल, गजेन्द्र आचार्य, टंक उप्रेती, बालकुमार कट्वाललगायतका कानून व्यवसायीले बहस गरेका थिए ।

यसअघि अदालतले उनलाई २५ दिन हिरासतमा राखेर अनुसन्धान गर्न अनुमति दिएको थियो । उनी पक्राउ परेकै दिनदेखि बीएण्डसी अस्पतालमा बस्दै आएका थिए । पूर्वमेयर शिवाकोटीको उपचारको व्यवस्था मिलाउन पनि कारागार प्रशासनलाई पत्राचार गरिएको अदालतले जनाएको छ ।

क्याटेगोरी : अपराध/सुरक्षा, समाचार
ट्याग : #breaking, #किशोरीलाई बलात्कार गरेको अभियोगमा बिर्तामोडका पूर्वमेयरलाई थुनामा पठाउन आदेश