प्रहरीबाटै अनुशासन उल्लंघन : ‘युनिफर्म’ दुरुपयोग गर्ने सहायक हवल्दारलाई कस्को संरक्षण ?

राजीव श्रेष्ठ भैरहवा संवाददाता २०८१ भदौ १ गते १४:१८ मा प्रकाशित

भैरहवा । नेपाल प्रहरीमा प्रहरी पोशाकको दुरुपयोग हुने क्रम अझै रोकिएको छैनन् । प्रहरी आचारसंहिता बिपरित सामाजिक सञ्जालमार्फत प्रहरी पोशाक लगाएको फोटो तथा भिडियोहरु फेसबुक, ट्विटर तथा टिकटकमा भेटिन थालेपछि प्रहरी प्रधान कार्यालयले उक्त सामाग्री भए तत्काल हटाउन निर्देशन दिएको भएपनि त्यसको अझै पालना भएको छैनन् ।

२०७७ असोज २२ गते (बिहिबार) नेपाल प्रहरीले प्रयोग गर्ने प्रहरी पोशाकको जथाभावी दुरुपयोग हुन थालेपछि प्रहरी प्रधान कार्यालयले गम्भीर ध्यानाकर्षण भएको जनाएको थियो । नेपाल प्रहरीले जारी गरेको प्रेस बिज्ञप्तीमा विभिन्न चलचित्र, टेलिचलचित्र, प्रान्क भिडियो, सांगातिक भिडियो, टिकटक, सर्ट मुभिज, टेलिभिजन तथा स्टेज कार्यक्रमहरुमा प्रहरी पोशाक प्रयोग हुन गएकोमा प्रहरी प्रधान कार्यालयको गम्भीर ध्यानाकर्षण भएको र भिडियो तथा सामाग्रीहरु अपलोड भए तत्काल हटाउन समेत अपिल गरेको थियो ।

हेर्नुहोस : प्रहरी मुख्यालयले जारी गरेको बिज्ञप्ती

तर, प्रहरी प्रधान कार्यालयले यसरी विज्ञप्ती निकालेको लामो समय बितिसक्दा समेत सामाजिक सञ्जालमा प्रहरी पोसाकको दुरुपयोग हुने क्रम भने रोकिएको छैन । सामाजिक रुपमा उत्तरदायी बनेर समाजमा सकारात्मक सन्देश प्रवाह गर्नुपर्ने रुपन्देही प्रहरी यतिबेला पोसाक लगाएको फोटो फेसबुकमा अपलोड गरेर रमिता देखाएका छन् । ईलाका प्रहरी कार्यालय धकधईको मातहतमा रहेको सामुदायिक प्रहरी सेवा केन्द्र धकधईका प्रहरी सहायक हवल्दार संजय सहनीले प्रहरी निर्देशिका बिपरित फोटो पोस्ट गरेका छन् । प्रहरी मुख्यालयको निर्देशन एवं परिपत्रलाई भैरहवाका प्रहरीले रद्दीको टोकरीमा फालिरहदा समेत कार्वाही गर्ने वा स्पष्टीकरण सोध्नेसम्मको आँट प्रहरी मुख्यालयको छैनन् । उल्टै उनलेे आफु नवलपरासीमा लामो समय बसेको बताउँदै १० बर्ष बसेको अवधिमा १५ वटा एसपी चेन्ज गरेको धाकधम्की दिने समेत गरेको प्रहरी स्रोत बताउँछ ।

संगठनको आदेशलाई चुनौती दिएर प्रहरी पोशाकमै सामाजिक सञ्जालमा फोटो अपलोड गरेको भए पनि ईलाका प्रहरी कार्यालय धकधईका प्रहरी प्रमुख प्रहरी निरीक्षक कृष्ण घिमिरे भने कानमा तेल हालेर बसेका छन् । स्रोतका अनुसार प्रहरी निरीक्षक घिमिरेलाई प्रहरी कर्मचारीलाई तर्साउने, गाली गर्ने र अरुको कुरा नसुन्ने बताइएको छ । धकधईमा कायारर्त सहायक हवल्दार सहनी त एक प्रतिनिधि पात्र मात्रै हुन् ।

यसअघि जिल्ला प्रहरी कार्यालय रुपन्देहीमा कार्यरत प्रहरी निरीक्षक राजेश बस्नेतले पनि तालिमका क्रममा खिचेको प्रहरी पोशाक लगाएको फोटो सामाजिक सञ्जालमा हालेको भन्दै उनीविरुद्ध उजुरी नै परेको थियो । प्रहरी प्रधान कार्यालयको प्रहरी महानिरीक्षकको कार्यालयमा उजुरी परेपछि अहिले उनलेे आफ्नो फोटो फेसबुकबाट हटाइसकेका छन् । उनी विरुद्ध छानबिन भईरहेको जिल्ला प्रहरी कार्यालय रुपन्देहीका एसपी रन्जित सिंह राठौरले जानकारी दिए । उहाँ विरुद्ध उजुरी परेको हो, हामी अहिले छानबिन गर्दै छौँ । उनलेे भने, प्रहरी आचारसंहिता बिपरित कार्य गरेको पुष्टि भए कार्वाही हुन्छ । तीन साता अघि परेको उजुरीमा एसपी राठौर अझै छानबिनकै क्रममा रहेको बताउँछन् । यसले प्रहरीलाई जोगाउने र प्रहरी आचारसंहिता बिपरित कार्य गर्ने प्रहरीलाई थप सहयोग पुग्ने स्रोत बताउँछ । एसपी राठौरले सहायक हवल्दार सहनीको बिषयमा थप बुझ्ने बताए ।

यसरी केही प्रहरीले आफ्नो जिम्मेवारी र मर्यादाको धज्जी मात्र उडाएको छैनन् कि सिङ्गो प्रहरी संगठनको नै बेइज्जत गरिरहेको देखिन्छ । हरेक महिना जसो एक-दुई जना प्रहरीहरू कारबाहीमा पर्दै आएको प्रहरीको तथ्यांकमा छ । प्रहरी ऐन २०१२ मा पनि प्रहरीले आफ्नो जिम्मा रहेको बर्दी लगायतका उपकरण दुरुपयोग गर्न नहुने उल्लेख छ । यता, प्रहरीले समाजमा सकारात्मक सन्देश दिने र सामाजिक हितका सामग्री पोस्ट गर्ने भने बन्देज लगाइएको छैनन् ।

बर्दी लगाइ फोटो खिच्ने र फेसबुकमा रंगाउने काम गर्न पाइदैन : प्रवक्ता

यता, नेपाल प्रहरीका प्रहरी प्रवक्ता दानबहादुर कार्कीले ड्युटीमा खटिएको समयमा बर्दी लगाइ फोटो खिच्ने र फेसबुकमा रंगाउने काम नगर्न प्रहरी कर्मचारीलाई सुझाव दिएका छन् । उनलेे आफ्ना संगठनभित्र रहेका प्रहरी कर्मचारीले आचारसंहिता बिपरित फेसबुकमा प्रहरी पोशाक लगाएको फोटो राखेको पाइए कारबाही गर्ने र सो, कार्यलाइ समेत पछिल्लो समय तीव्र पारिएको बताउँदै डिआइजी कार्कीले पोशाक दुरुपयोग गर्ने सर्वसाधारणलाई पनि यत्तिकै नछाडिने बताएका हुन् ।

डिआइजी कार्कीले भने, ‘‘प्रहरी पोशाक र प्रहरीले प्रयोग गर्ने अरू सामग्री दुरुपयोग नगर्न पटक पटक सचेत गराउँदै आएका थियौं । अटेर गर्दै फेसबुकमा पोस्ट गर्ने काम भइरहेको छ । सूक्ष्म तरिकाले सबै कर्मचारी निगरानी गर्दै छौँ , कारबाही नगरी त्यत्तिकै छाड्दैनौँ ।’’ ड्युटीको समयमा बर्दी तथा हतियार सहित टिकटक भिडियो बनाउने तथा फेसबुकमा फोटो पोस्ट गर्ने धेरै प्रहरी कर्मचारीहरू कारबाहीमा परिसकेको बताउँदै उनलेे सर्वसाधारणलाई समेत कार्वाही हुने बताएका हुन् ।

सूचना दिनुस्, कार्वाही गर्छु – प्रदेश प्रहरी प्रमुख

यता, लुम्बिनी प्रदेश प्रहरी कार्यालयका डिआइजी कुबेर कडायतले कुनै पनि दर्जाका प्रहरी कर्मचारीले प्रहरी युनिफर्म लगाएको फोटो राख्न नपाउने बताउँछन् । लुम्बिनी प्रदेश प्रहरी कार्यालयका प्रहरी प्रमुख समेत रहेका डिआइजी कडायतले भने सूचना आए प्रहरी आचारणबिपरितका गतिविधिमा संलग्न कसैलाई नछाड्ने बताउँछन् । हेड्क्वाटरले निगरानी गरिरहेको बताउँदै डिआइजी कडायत भन्छन् : प्रहरी मुख्यालयको निर्देशन बिपरितका कार्य गर्ने कसैलाई छाड्दैनौं । प्रहरी पोशाकमा सामाजिक सञ्जालमा राख्ने सबैलाई कार्वाही गर्ने बताइदै उनलेे भने, सूचना दिए कार्वाही गर्ने बताए । पटकपटक हेड्क्वाटरले परिपत्र गरेको अवस्थामा पनि प्रहरी पोशाक लगाएर सामाजिक सञ्जालमा हाले निर्मतापुर्वक बिभागीय कार्वाही हुने उनले बताए ।

तस्वीर स्रोत : (सबै फोटो सम्बन्धि प्रहरी कर्मचारीकै फेसबुकबाट लिइएको हो)

क्याटेगोरी : अपराध/सुरक्षा, विशेष, देश परदेश, समाचार, समाज, स्थानीय