भरतपुरको मिलन चोक नजिकै कल्भर्टमुनि बोरामा पोको पारेर फालेको अवस्थामा भेटिएका पुरूष र महिलालाई महिलाका पतिले मारेको खुलासा भएको छ।

मृतक र हत्यामा संलग्न सबै भारतीय नागरिक हुन्। उनीहरू भारतको विहार राज्यका हुन्।

नेपाल प्रहरीको केन्द्रीय अनुसन्धान ब्युरोको अनुसार भारतका विहार सुगांव डीह, सुगौली, पूर्वी चम्पारणका ३३ वर्षीय अखिलेश भगतले ती पुरूष र महिलाको हत्या गरेको खुलेको हो।

ब्युरोका प्रवक्ता एसपी नवराज अधिकारीका अनुसार मृतकहरू भारतको मोतिहारी, फूलबारीया, सुगौलीका १९ वर्षीय ऋषभकुमार कुशवाहा र विहार सुगांव डीह, सुगौली, पूर्वी चम्पारणकी ३० वर्षीया अस्मिता भन्ने सन्जु देवी हुन्। मंसिर २ गते उनीहरूको हत्या गरेको अनुसन्धानबाट खुलेको हो।

प्रहरीले मंसिर ६ गते राति पौने १ बजेतिर मिलनचोकस्थित कल्भर्टमुनि केरुङ्गा घोलमा शंकास्पद रूपमा रहेका २ वटा शव फेला पारेको थियो। मुखमा टेप लगाइएको, घाँटीमा सलजस्तो रातो कपडाले कसेको, दुबै शवको दुबै हात, खुट्टा क्रस गरी डोरीले बाँधी सोही डोरीले घाँटीमा समेत बाँधी डल्लो बनाई जुटको बोराभित्र कोचिएको थियो।

प्रवक्ता अधिकारीले मंसिर २ गते ऋषभ र सन्जुलाई भगतले उनीहरू बस्ने गरेको भाडाको कोठामा नै कर्तव्य गरी एउटा शवलाई ३ गते बिहान पौने १ बजेतिर र अर्कोलाई सवा १ बजेतिर साइकलमा लगेर लुकाएको प्रमाण फेला परेको बताए। भगतले शव लगेको दृष्य प्रहरीले सिसिटिभी फुटेजमा फेला पारेको उनले बताए।

अधिकारीले आफ्नी श्रीमतीसँग ऋषभको सम्बन्ध रहेको थाहा पाएपछि अखिलेश र ऋषभको बेला बेलामा झगडा हुने गरेको भेटिएको बताए। त्यही कारण अखिलेशले उनीहरूको हत्या गरेको हुनसक्ने अधिकारी बताउँछन्।

दुई जनाको हत्या गरी फरार भएका अखिलेश अहिले भारतको सुगौलीस्थित प्रहरी हिरासतमा छन्। भारतीय प्रहरीसँग समन्वय गरी खोजतलास गर्दा उनीमाथि भारतको प्रहरी थाना सुगौलीमा अपहरण तथा व्यक्ति बेपत्तासम्बन्धी एफआइआर दर्ता भई पुस १६ गते प्रहरीले पक्राउ गरेको थियो। उनलाई हाल भारतको केन्द्रीय कारागृह मोतिहारीमा राखिएको छ।

नेपाल प्रहरीले भारतीय प्रहरीको समन्वयमा उनलाई अनुसन्धान तथा सोधपुछ गर्दा उनले चितवनमा ऋषभकुमार कुशवाह र आफ्नी श्रीमतीको हत्या गरेर भागेको स्वीकार गरेको सिआइबीका प्रवक्ता अधिकारीले बताए।

नेपाल प्रहरीको केन्द्रीय अनुसन्धान ब्युरो, बागमती प्रदेश प्रहरी कार्यालय हेटौंडा र जिल्ला प्रहरी कार्यालय चितवनको संयुक्त टोलीले घटनास्थलको सूक्ष्म अध्ययन, प्राविधिक विश्लेषण, संकलित सूचना समेतको विश्लेषण गरी अनुसन्धानलाई निष्कर्षमा पुर्‍याएको उनले बताए।

थप समाचार

६० लाख रुपैयाँको बैंक ग्यारेन्टी दिएर थुनामुक्त भए रवि, देशमा…

अधिवक्ता त्रिपाठीमाथि हातपातको घटनामा रास्वपाले भन्यो- पार्टी सदस्य संलग्न भेटिए…

रवि लामिछानेलाई धरौटीमा छोड्ने जिल्ला अदालतको आदेशमा के छ ?

संखुवासभाको बार्हबिसे बजारमा आगलागीबाट पाँच घर जल्यो