चितवनमा एकै दिन ३ वटा शवहरु भेटिए

साझा पाना २०८० मंसीर ६ गते १५:३७ मा प्रकाशित

चितवनमा एकै दिन ३ वटा वेवारिसे शवहरु भेटिएका छन् । पूर्वी चितवनको खैरहनी एक र भरतपुरमा दुई गरि एकैदिन ३ जनाको शव भेटिएको हो । तीनैवटा शवको पहिचान गर्न स्थानीय र प्रहरीले सकेका छैनन्। बोराभित्र पोको पारेको अवस्थामा भरतपुर महानगरपालिका वडा नम्बर ९ मिलनचोकस्थित कल्भर्टमा दुई वटा शव फेला परेको हो। जिल्ला प्रहरी कार्यालय चितवनका डिएसपी विजयराज पण्डितका अनुसार बुधबार दिउँसो शव फेला परेको हो। अन्दाजी ३० वर्षका पुरूष र महिलाको शव जुटको बोराभित्र फेला परेको छ,’ उनले भने, ‘दुबै जनाको हात-खुट्टा बाँधिएका छन्। मुखमा टेप समेत लगाइएको छ।’ उनका अनुसार खोलामा एक व्यक्ति माछा मार्न पुगेका थिए। गन्ध आएपछि ती व्यक्तिले बोरा देखेर शंका लागेपछि प्रहरीलाई खबर गरेको डिएसपी पण्डितले बताए। शवको सनाखत भइसकेको छैन। त्यस्तै खैरहनी नगरपालिका वडा ९ को राजमार्ग छेउमा एउटा शब फेला परेको छ । उक्त शबको पनि पहिचान खुलेको छैन । प्रहरीले घटनाबारे अनुसन्धान सुरू गरेको जनाएको छ ।

क्याटेगोरी : समाचार, समाज