संसदीय विशेष समितिको प्रतिवेदन राष्ट्रिय सभामा पेश

साझा पाना २०७९ पुस २९ गते १६:२५ मा प्रकाशित

काठमाडौँ । सङ्घीयता कार्यान्वयन अध्ययन तथा अनुगमन संसदीय विशेष समितिको प्रतिवेदन राष्ट्रिय सभामा पेश भएको छ ।

राष्ट्रिय सभाको आजको बैठकमा समितिका संयोजक खिमलाल भट्टराईले सङ्घीयता कार्यान्वयन अध्ययन तथा अनुगमन संसदीय विशेष समितिको प्रतिवेदन र सातै प्रदेशका प्रदेशगत प्रतिवेदनहरू सभा समक्ष पेश गर्नुभयो ।

यस अघि विशेष समयमा बोल्नुहुँदै सांसद जगप्रसाद शर्माले मुलुकको समृद्धिका लागि सुशासन र स्थिरता आवश्यक पर्ने भन्नुहुँदै दलहरू एकताबद्ध भएर समृद्धिको पथमा अघि बढ्नुपर्ने बताउनुभयो ।

सांसद जितेन्द्र नारायण देवले राजनीतिक आन्दोलनका कारण अन्यायमा परेका रेशम चौधरी लगायतलाई न्याय दिनुपर्ने धारणा राख्नुभयो ।

उहाँले सङ्घीयतालाई प्रभावकारी बनाउन नागरिकको आवश्यकता र चाहानालाई प्राथमिकता दिनुपर्ने बताउनुभयो ।

सांसद भैरव सुन्दर श्रेष्ठले सरकारले न्यूनतम साझा कार्यक्रममार्फत मुलुकको समृद्धिको योजना अघि सारेको भन्नुहुँदै वर्तमान सरकारले जनताको पक्षमा काम गर्ने विश्वास व्यक्त गर्नुभयो ।

सांसद बामदेव गौतमले नेपाली काँग्रेसले प्रधानमन्त्री पुष्पकमल दाहाल (प्रचण्ड)लाई विश्वासको मत दिनु स्वाभाविक भएकाले धेरै टिका टिप्पणी गर्नु आवश्यक नभएको उल्लेख गर्नुभयो ।

बैठकमा सांसद्हरु जयन्तीदेवी राई, मोहम्मद खालिद, खिमलाल देवकोटा,शेखरकुमार सिंह, भगवती न्यौपाने, उदयबहादुर बाहोरा, विमला घिमिरे, प्रकाश पन्थ लगायतले समसामयिक विषयमा आ आफ्नो धारणा राख्नुभयो

राष्ट्रियसभाको अर्को बैठक माघ ५ गते दिउँसो १ बजे बस्ने छ ।

क्याटेगोरी : समाचार
ट्याग : #hot, #राष्ट्रिय सभा