सुनको ब्रास्लेट चोरी गर्ने भरतपुर अस्पतालका सेक्युरिटी गार्ड पक्राउ

प्रनिश थापा चितवन संवाददाता २०७९ पुस २१ गते १९:११ मा प्रकाशित

चितवन । सवारी दुर्घटनामा परी मृत्यु भएका एक ब्यक्तिको सुनको ब्रास्लेट चोरी गर्ने भरतपुर अस्पतालका सेक्युरिटी गार्ड पक्राउ परेका छन् ।

जिल्ला प्रहरी कार्यालय चितवनका अनुसार ट्रकको ठक्करबाट मृत्यु भएका मोटरसाईकल चालक तनहुँ भानु नगरपालिका वडा नंम्बर २ घर भई हाल भरतपुर महानगरपालिका १ बस्ने ३७ बर्षीया सञ्जिव बहादुर रायमाझीको सुनको ब्रास्लेट चोरी गर्ने खोटाङ ऐसेलुखर्क गाउँपालिका वडा नंम्बर ६ घर भई हाल भरतपुर महानगर वडा नंम्बर ७ बस्ने २७ बर्षीया कृष्ण राईलाई बुधबार प्रहरीले पक्राउ गरेको हो ।

रायमाझी सवार बागमती प्रदेश ०३-००३ प ६५७४ नंम्बरको मोटरसाईकल लाई पौष १७ गते साँझ भरतपुर महानगरपालिका २९ केरावारीस्थित सडक खण्डमा ना ५६ ख ३३१२ नंम्बरको ट्रकले ठक्कर दिईएको थियो । गम्भीर अवस्थामा रहेका उनको भरतपुर अस्पतालमा उपचार गराउने क्रममा मृत्यु भएको थियो ।

मृतकको लासलाई अस्पतालकै आकस्मिक कक्ष नजिक रहेको एक कोठामा राखिएको अवस्थामा उनको हातमा लगाएको सुनको ब्रास्लेट चोरी भएको थियो । चोरी भएको सुनको ब्रासलेटसहित चोरी कार्यमा संलग्न राईलाई नियन्त्रणमा लिई चोरी कसुरमा सम्मानित चितवन जिल्ला अदालतबाट बिहीबार म्याद अनुमती लिई थप अनुसन्धान गर्ने कार्य भईरहेको जिल्ला प्रहरी कार्यालय चितवनले जनाएको छ ।

क्याटेगोरी : अपराध/सुरक्षा, ब्रेकिंग न्युज, विशेष, देश परदेश, समाचार, स्थानीय