धादिङ ।  धादिङको त्रिपुरासुन्दरी गाउँपालिका वडा नम्बर ३ मुलपानीस्थित आहालेमा सोमबार बिहान मृत भेटिएका दम्पतीको हत्या बारे नेपाल प्रहरीको केन्द्रिय अनुसन्धान टोलीले घटनास्थलको अनुसन्धान गरेको छ ।

केन्द्रिय अनुसन्धान टोलीले तालिमप्राप्त कुकुरको प्रयोग गरेर घटनाको अनुसन्धान थालेको हो ।

जिल्लाको उत्तरी क्षेत्रमा पर्ने आहालेका ७५ वर्षिय विष्णु बहादुर आलेमगर र उनका श्रीमती ६८ वर्षिय निरमाया आलेमगर आफ्नै घरमा हत्या गरिएको अवस्थामा सोमबार बिहान भेटिएका हुन् ।

हत्या गरिएका दम्पति जस्ता र काठको कच्ची घरमा बस्दै आएका थिए ।

विष्णुबहादुरको शव घर बाहिर खाटमा उत्तानो परेको अवस्थामा भेटिएको थियो । निधारमा र दाहिने आँखामाथी गहिरो चोट छ । निरमायाको शव घरभित्रै भेटिएको छ ।

घटनास्थल वरपर शंकास्पद केही देखिदैन । चोट लागेको ठाउँमा रगतका टाटा मात्रै देखिन्छ । तर, घटनाको प्रकृति हेर्दा हत्या नै हो भन्न सकिन्छ । घटनास्थल पुगेका जिल्ला प्रहरी कार्यालय धादिङका प्रहरी नायव उपरीक्षक श्याम बहादुर खत्री भन्छन्- ‘घरभित्र भएको निरमायाको शव र घर बाहिर खाटमा नै भएको विष्णुबहादुरको शवको अवस्था र घटनास्थलको प्रारम्भिक अनुसन्धान अनुसार नियोचित ढंगबाट हत्या भएको देखिन्छ ।’

हत्या भएका दम्पतिको एक छोरी र छोरा छन् । छोरा काठमाडौमा डेन्टल क्लिनिक चलाउदै आएका छन् भने छोरी विवाह पश्चार श्रीमानसंगै काठमाडौंमा बस्दै आएका छन् ।

घटनास्थलको प्रारम्भिक अनुसन्धान पश्चात् प्रहरीले शवलाई पोस्टमार्टमको लागि जिल्ला सदरमुकाम ल्याउने तयारी गरिरहेको छ । घटना स्थल पुग्न जिल्ला सदरमुकाम धादिङबेसीबाट करिव तीन घण्टा लाग्छ ।

क्याटेगोरी : अपराध/सुरक्षा, समाचार
ट्याग : ##धादिङ, #त्रिपुरासुन्दरी गाउँपालिका

---

---

---