हिमाल र पहाडको सौन्दर्यले भरिएको मुस्ताङ

साझा पाना २०७९ कात्तिक २७ गते १९:३५ मा प्रकाशित

काठमाडौं । हिमालपारीको जिल्ला मुस्ताङ प्राकृतिक रूपले सिंगारिएको छ ।

यसको सदरमुकाम जोमसोम हो । यस जिल्लाको पूर्वमा मनाङ, पश्चिममा डोल्पा दक्षिणमा म्याग्दी र उत्तरमा चीनको तिब्बत पर्दछ ।

गण्डकी प्रदेशमा पर्ने जिल्ला मुस्ताङमा दर्जनौ यस्ता ठाउँ छन् जहाँ पुग्नेले नौलो अनुभूति गर्दछन् । सडक र हवाई यात्रा गरेर मुस्ताङ पुग्न सकिन्छ । मुस्ताको मध्य भाग भएर कालीगण्डकी नदी बग्दछ । यस नदीलाई स्थानीय भाषामा थाक खोला पनि भनिन्छ । मुस्ताङका धेरै जसो बस्ती यही नदीको किनारमा अवस्थित छन् ।

जोमसोम, मार्फागाउँ, घासा, लेते, लोमान्थाङ्ग, कागवेनी, छुसाङलगायतका ग्रामीण बजारले यो जिल्लामा रौनकता ल्याएका छन् । हिन्दु र बौद्धहरूको आस्थाको केन्द्र मुक्तिनाथ र कागवेनीमा भक्तजनहरूको भीड लाग्ने गरेको छ ।

मुस्ताङ नेपालको सबैभन्दा उत्तरमा पर्ने जिल्ला हो । हिमालपारीको जिल्लाको नामबाट चिनिने यो जिल्ला धवलागिरि र निलगिरि दुई अग्ला हिमशिखरको बीचमा अवस्थित छ । करिब तीन हजार वर्ष भन्दा अगाडिको पुरातात्विक उत्खननबाट देखिए अनुसार यो क्षेत्र परापूर्वकालमा नेपाल र तिब्बत बीचको व्यापारिक मुख्य नाका रहेको बुझिन्छ ।

कसरी जाने मुस्ताङ ?

काठमाडौंबाट बस, जीपबाट सिधै र हवाईजहाज चढेर मुस्ताङ जान सकिन्छ । काठमाडौं पोखरा र पोखराबाट जोमसोम हवाइजहाजमा जान सकिन्छ । काठमाडौंबाट पोखरा करिव २०० किलोमिटर, पोखरबाट जोमसोम १७२ किलोमिटर रहेको छ । माथिल्लो मुस्ताङ पुग्न भने ४६० किलोमिटर हाराहारीको सडक पार गर्नु पर्दछ ।

कस्तो छ खाने बस्ने व्यवस्था ?

मुस्ताङ जिल्लाका बजारमा साना, मझौला, ठूला होटेलहरू छन् । जहाँ कोठाको भाडा १ हजार ५०० रूपैयाँदेखि होटेलको स्तर अनुसार पर्ने गर्दछ । सादा खानाको ४०० रूपैयाँदेखि ५०० सय रूपैयाँसम्म पर्दछ । स्थानीय बासिन्दाको मिठो स्वागतले तपाईलाई निकै खुशी मिल्नेछ ।

घुम्ने ठाउँ के–के छन् ?

जोमसोम, मार्फागाउँ, घासा, लेते, लोमान्थाङ्ग, कागवेनी, छुसाङ, मुक्तिनाथ, नेपाल चीन सीमानालगायतका स्थानमा घुम्न सकिन्छ । स्थानीय बौद्ध गुम्बा, स्याउको मौसम भएमा स्याउ बगैंचा पनि हेर्न र घुम्न पाइन्छ । धवलागिरि र अन्य हिमश्रृङखलाको समेत अवलोकन गर्न सकिन्छ ।

अनौठो र अतभूत देखिने पहाडको कलात्कम दृश्य भने जोमसोम बजार कटेर माथिल्लो क्षेत्र लागेपछि चीनको सीमानासम्म देख्न सकिन्छ । फर्कदा म्याग्दीको तातोपानी, बाग्लुङको कालिका भगवती, पर्वत बाग्लुङ जोड्ने झुलुङ्गे पुल, कुस्मा बजार, पोखरा समेत घुम्न सकिन्छ ।

कोसेली के ल्याउने ?

स्याउ, भेडाको उनबाट बनेको टोपी, पछ्यौरा, गलबन्दी, छुर्पी, स्याउको सुकुटी, ब्राण्डी, जाम, टिमुर, जिम्बुलगायत कुराहरू स्थानीय बजारमा पाइन्छन् ।

समस्या केही आउँछ ?

मुस्ताङ जादाँ मुख्य समस्या सडक हो । जहाँ पुग्दा करिब १५ देखि २० किलोमिटर सडक निकै अप्ठेरो छ । तीन हजार ८०० मिटर उचाइमा भएकाले मुक्तिनाथमा कोहीलाई लेक लाग्न पनि सक्छ । माथिल्लो मुस्ताङ नेपाल चीन सीमानाको उचाई करिब चार हजार ७०० मिटर भएकाले त्यहाँ पनि सो समस्या केही मानिसलाई हुन सक्छ ।

क्याटेगोरी : समाचार
ट्याग : #hot, #मुस्ताङ, #हिमाल र पहाडको सौन्दर्यले भरिएको मुस्ताङ