एमसीसी र नागरिकता विधेयकमा सत्ता गठबन्धनले तमासा गर्यो : ईश्वर पोखरेल

साझा पाना २०७९ असोज १२ गते १८:०६ मा प्रकाशित

काठमाडौं । नेकपा एमालेका वरिष्ठ उपाध्यक्ष ईश्वर पोखरेलले एमसीसी, छिमेकीसँगको सम्बन्ध र नागरिकता विधेयकमा सत्ता गठबन्धनले तमासा गरेको बताउनुभयो । आज काठमाडौं वडा नम्बर ३ स्थित रानीदेवी समूहले लाजिम्पाटमा आयोजना गरेको बडादसैंको शुभकामना आदानप्रदान कार्यक्रममा उहाँले यस्तो बताउनुभएको हो ।

उहाँले भन्नुभयो, ‘प्रधानमन्त्रीले निकालेको किताबमा चुच्चे नक्सा गायब भयो । हामीसँग दुई वटा ठुला छिमेकी देश छन्, एउटा छिमेकीलाई नजिक र एउटालाई टाढा गर्न हामीले जरुरी छैन । तर, छिमेकीसँग आँखामा आँखा जुधाएर कुरा गर्ने सामर्थ्य हाम्रो हुनुपर्छ ।’

जनताको भावना अनुसार काम गर्न र जनतासँगको सम्बन्धलाई बलियो बनाउन पनि उहाँले जनप्रतिनिधिहरूलाई आग्रह गर्नुभयो । आगामी निर्वाचनमा एमालेले विजय हासिल गर्ने उहाँले बताउनुभयो । ‘मंसिर ४ गते एमाले आउँछ । सूर्य चिन्ह आउँछ–आउँछ ।’

त्यस्तै कार्यक्रममा उहाँले जनताका पक्षमा राम्रा काम जसले गरेपनि एमालेले समर्थन गर्ने बताउनुभयो । उहाँले थप्नुभयो ‘राम्रा काम जसले गरेपनि एमालेले समर्थन गर्छ । राम्रा कामलाई राम्रो भन्नुपर्छ, नराम्रो कामलाई नराम्रो भन्नुपर्छ । राम्रा काम जोसुकैले गरुन्, त्यसलाई हाम्रा काम बनाउनुपर्छ । सबै हाम्रा राम्रा नहुन सक्छन्, हामीले खोजेको राम्रो काम हो ।’

पूर्वउपप्रधानमन्त्री समेत रहनुभएको पोखरेलले भन्नुभयो, ‘अहिले विभिन्न साथीहरू विभिन्न रूपले प्रकट हुनुभएको छ । तर, दलीय प्रणालीमा दललाई कमजोर बनाउने कुरा मान्य हुँदैन । एउटा दल खराब भए फेरि अर्को दल आउँछ ।’

क्याटेगोरी : समाचार
ट्याग : #ईश्वर पोखरेल, #नेकपा एमालेका वरिष्ठ उपाध्यक्ष ईश्वर पोखरेल