मकवानपुरमा पछिल्लो २४ घण्टामा थप ६५ जनामा डेंगी संक्रमण पुष्टि

साझा पाना २०७९ भदौ २४ गते १६:०६ मा प्रकाशित

मकवानपुर। मकवानपुरमा पछिल्लो २४ घण्टामा थप ६५ जनामा डेंगी संक्रमण पुष्टि भएको छ ।

पछिल्लो एक महिनामा यहाँ लामखुट्टेको टोकाइबाट हुने डेंगी संक्रमितको संख्या बढ्दै गएको स्वास्थ्य कार्यालय मकवानपुरका जनस्वास्थ्य अधिकृत एवं सूचना अधिकारी लक्ष्मण घिमिरेले जानकारी दिए । उनले गएको १ साउनबाट बिहीबारसम्म ९ सय ८ जनामा डेंगी पुष्टि भएको बताए । स्वास्थ्य कार्यालयका अनुसार जिल्लाको हेटौंडा उपमहानरपालिकाको १,२,३,४ र ५ नंबरमा बढी डेंगी संक्रमित भएका छन् ।

यसैगरी,जिल्लाको मनहरी र मकवानपुरगढी गाउँपालिकामा पनि डेंगीका बिरामीहरु देखा परेको कार्यालयले जनाएको छ । जिल्लामा ज्वरो र डेंगीका बिरामीहरु बढे संगै अस्पताल र निजी स्वास्थ्य क्लिनिकहरुमा बिरामीको चाप पनि बढेको घिमिरेले बताए ।

जनस्वास्थ्य अधिकृत घिमिरेले हेटौंडामा डेंगी नियन्त्रण अभियान सुरु गरिएको बताए । स्वास्थ्य कार्यालयले उपमहानगरपालिका र विभिन्न संघसंस्थासंग सहकार्य गर्दै लामखुट्टेको लार्भा नष्ट गर्ने कार्य र सचेतनामूलक कार्यक्रमहरू गरिरहेको छ । तर पनि जिल्लामा दिनप्रति दिन डेंगीका बिरामी बढ्दै गएका छन् ।

अघिल्लो आर्थिक वर्ष २०७८/०७९ मा जिल्लामा १९५ जनामा मात्र डेंगी पुष्टि भएको थियो भने १ जनाको मृत्यु भएको थियो । त्यसअघि, जिल्लामा आर्थिक वर्ष २०७७/०७८ मा १४, २०७६/०७७ मा २ हजार ४३४ र २०७६/०७६ मा ७५ जनामा डेंगी पुष्टि भएको जिल्ला स्वास्थ्य कार्यालय मकवानपुरको तथ्याङ्क छ ।

यसैगरी, जिल्लामा लामखुट्टेकै टोकाइबाट हुने जापानिज इन्सेफलाइटिस संक्रमणबाट जिल्लामा चालु वर्षमै ३ जनाको मृत्यु भएको छ । गएको साउनयता जापानिज इन्सेफलाइटिस संक्रमणबाट जिल्लाको बकैया–७ का दुई जना र हेटौंडा–३ का १ जनाको मृत्यु भएको कार्यालयले जनाएको छ ।

पछिल्लो केहि साता यता देशभर डेंगीको बिरामीहरु बढेका छन् । स्वास्थ्य तथा जनसंख्या मन्त्रालयले डेंगी नियन्त्रणको लागि प्रदेश र स्थानीय सरकारसंग समन्वय र सहजीकरण गर्ने तयारी थालेको जनाएको छ ।

क्याटेगोरी : समाचार
ट्याग : #डेंगी संक्रमण पुष्टि, #मकवानपुर