काठमाडौं– नेपाली राष्ट्रिय क्रिकेट टोलीका कप्तान सन्दीप लामिछानेमाथि लागेको बलात्कार आरोपको पक्षमा प्रहरीले बलियो प्रमाण भेटाएको दाबी गरेको छ । उनीहरू बसेको होटलको सीसीटिभी फुटेज संकलन गर्ने क्रममा महत्त्वपूर्ण फुटेज भेटिएको प्रहरीले दाबी गरेको हो।

प्रहरीले संकलन गरेको सीसीटीभी फुटेज अनुसार लामिछाने किशोरीलाई लिएर भदौ ५ गते राति ११ बजेर ५५ मिनेटमा होटलभित्र प्रवेश गरेको देखिएको छ।

सन्दीपले सेतो क्याप, सेतो जुत्ता, निलो रंगको टिसर्ट लगाएको पनि फुटेजमा देखिएको प्रहरी स्रोतले जनाएको छ। किशोरीले सेतो ज्याकेट, पहेँलो टिसर्ट र कालो जिन्स लगाएकी थिइन्।

त्यहाँ करिब सात घन्टा बसेर भदौ ६ गते फर्किएको देखिएको छ। बिहान ६ बजेर ४६ मिनेटमा उनीहरू सँगै होटलबाट फर्किएको फुटेजमा देखिन्छ। प्रहरीले थप अनुसन्धान जारी रहेको बताएको छ ।

लामिछाने हाल क्यारेबियन प्रिमियर लिग (सिपिएल) खेल्न सेन्ट लुसिया पुगेका छन् । त्यसअघि लामिछानेको कप्तानीमा राष्ट्रिय क्रिकेट टोली केन्या भ्रमणमा गएको थियो । सो घटना त्यसअघि भएको बुझिएको छ ।

भदौ ५ गते किशोरीलाई आफ्नो निजी कारमा लिएर नगरकोट पुगेको र नगरकोटमै बस्ने योजना भएपनि किशोरीले नमानेपछि पुनः फर्किएर काठमाडौं आएको प्रहरी अनुसन्धानबाट खुलेको छ। त्यसपछि काठमाडौं आएर होटलको एउटा कोठा बुक गरेर उनीहरू सँगै बसेको पाइएको छ। जाहेरी आएसँगै प्रहरीले होटलमा गएर प्रमाण संकलन गरेको थियो ।

क्याटेगोरी : समाचार
ट्याग : #breaking, #सन्दीप लामिछाने

---

---

---