काँग्रेसले सय सिट पाउने गरी गठबन्धनमा सहमति हुनुपर्छ : डा.कोइराला

साझा पाना २०७९ भदौ १२ गते १४:३५ मा प्रकाशित

विराटनगर । नेपाली कांग्रेसका नेता डा.शेखर कोइरालाले आगामी निर्वाचन काँग्रेसले एक सय सिट पाउने गरी गठबन्धनमा सहमति हुनुपर्ने बताउनुभएको छ ।

नेपाली काँग्रेसको कार्यकर्ता प्रशिक्षण कार्यक्रमको आज विराटनगरमा उद्घाटन गर्नुहुँदै उहाँले भोलिका दिनमा सरकार चलाउन सहज हुने गरि सिट बाँडफाँड हुनुपर्ने बताउनुभयो ।

पार्टीभित्र सबैलाई मिलाएर लैजान पनि काँग्रेसले एक सय सिट पाउनेगरी सहमति कायम हुनुपर्ने उहाँको भनाई थियो ।

उहाँले काँग्रेसको जरा भनेको पार्टीका कार्यकर्ता हुन, कार्यकर्ता जति संंगठित हुन्छन् पार्टी त्यति नै बलियो हुने भएकाले पार्टी नेतृत्वले कार्यकर्ताको भावना बुझेर निर्णय लिनुपर्ने बताउनुभयो ।

नेता कोइरालाले सरकारले जनताको चाहना अनुसार मुलुकमा सुशासन कायम हुने गरि काम गर्नुपर्नेमा जोड दिनुभयो ।

नेपाली कांग्रेसका केन्द्रिय सदस्य डा.डिला सङ्ग्रौलाले कुनै दुबिधा नराखी आगामी निर्वाचनको तयारीमा लाग्न कार्यकर्ताहरूलाई आग्रह गर्नुभयो ।

नेपाली काँग्रेसका अर्का केन्द्रिय सदस्य रुकमणी कोइरालाले स्थानीय तह निर्वाचनको परिणामलाई हेरेर मात्र आगामी निर्वाचनका बारेमा मुल्याकङ्न गर्न नसकिने बताउनुभयो ।

प्रदेश न १ का आन्तरिक मामिला तथा कानुन मन्त्री केदार कार्कीले पार्टी एक ढिकका भएर लाग्ने हो भने आगामी निर्वाचनमा काँग्रेसलाई कसैले हराउन नसक्ने बताउनुभयो ।

विराटनगर महानगरपालिकाका प्रमुख एवं नेपाली काँग्रेस मोरङका उपसभापति नागेश कोइरालाले पार्टी सङ्गठन निर्माणमा जोड दिनुभयो ।

नेपाली कांग्रेस क्षेत्र न ६ को आयोजनामा भएको सो कार्यक्रममा क्षेत्रीय सभापति देवराज तामाङ, काँग्रेस क्षेत्र न ख का सभापति मधुबाबु तिवारी, प्रदेश न १ नेपाली कांग्रेसका सह महामन्त्री प्रमीला गच्छदार तथा कांग्रेस विराटनगर महानगर सभापति दिपक चापागाईँले आगामी निर्वाचनमा कांग्रेस एक जुट भएर जानुपर्नेमा जोड दिनुभयो ।

एक दिने सो कार्यक्रममा नेपाली कांग्रेसका सह महामन्त्री जीवन परियार तथा कांग्रेस नेता देवराज चालिसेले प्रशिक्षण दिनुहुने कार्यक्रम रहेको क्षेत्रीय सभापति तामाङले बताउनुभयो ।

क्याटेगोरी : समाचार
ट्याग : #डा. शेखर कोइराला