काठमाडौं । संस्कृति, पर्यटन तथा नागरिक उडड्यन मन्त्री जीवनराम श्रेष्ठले ५ हजार ८ सय देखि ८ हजार मिटरसम्मका नयाँ हिमालहरुलाई आरोहणको लागि खोल्ने तयारी गरेको बताएका छन् । ट्रेकिङ एजेन्सिज एसोसिएसन अफ नेपाल (टान)को साधारणसभामा उनले यस योजनाले पर्यटन क्षेत्रलाई उजागर गर्ने विश्वास लिएको बताए ।

“हामिले अहिले जुन खालको एउटा ५ हजार ८ सयदेखि ८ हजार मिटर सम्मका नयाँ हिमालहरुलाई पनि आरोहरणको लागि खोल्ने निर्णय गरेका छौं । त्यो योजनाभित्र समेटेका छौं । यसबाट मलाई लाग्छ कि टानको लागि पनि महत्वपूर्ण विषय हुन सक्छ । यसले नयाँ क्षेत्रहरुलाई उजागर गर्ने कुरा, पर्यटन क्षेत्रलाई आर्कषित गर्ने कुरा हुनसक्छ भन्ने हामिलाई लागेको छ ।”
मन्त्री श्रेष्ठले सन् २०२३–२०३३ सम्म नेपाल भ्रमण दशकको रुपमा चलाउने योजना अघि सारेको जिकिर गरे । उनले नेपालीहरुले पहिले नेपाल घुमौं, त्यसपछि मात्रै विदेश घुमौं भन्ने कुरा अगाडी सारेको बताउँदै विदेशमा बस्ने नेपालीहरुले एक जना विदेशीलाई नेपाल जाऔं भन्ने अभियान चलाउने तर्क राखे ।

“अहिले यो अवस्थामा हामिले पर्यटक दशकको रुपमा, नेपाल पर्यटन दशक भनेर २०२३ देखि ३३ सम्मलाई निरन्तर रुपमा काम अगाडी बढाउने र पर्यटन क्षेत्रलाई आर्कषित गर्ने र नेपालमा रहेका नेपालीहरुले पहिले नेपाल घुमौं, त्यसपछि मात्रै विदेश घुमौं भन्ने कुरालाई पनि अगाडी सारेका छौं । प्रत्येक विदेशमा बस्ने नेपालीहरुले एक जना विदेशीलाई नेपाल जाऔं भन्ने अभियान चलाउ भन्ने कुराहरुलाई पनि अगाडि सारेका छौं ।”
मन्त्री श्रेष्ठले नेपाललाई सिजनमा मात्र नभएर १२ औं महिना नै पर्यटक भित्र्याउने बताउँदै नेपालका पर्यटकीय क्षेत्रलाई ब्रान्डिड गर्ने तर्क राखे । उनले नेपाल एउटा पर्यटनको गन्तव्य स्थलको रुपमा विकास विकास गर्न सरकार लागि परेको जानकारी गराए ।।

क्याटेगोरी : पर्यटन, समाचार
ट्याग : #hot, #जीवनराम श्रेष्ठ, #ट्रेकिङ एजेन्सिज एसोसिएसन अफ नेपाल

---

---

---