निर्वाचन कार्यतालिका स्वीकृत

साझा पाना २०७९ साउन २४ गते १५:३८ मा प्रकाशित

निर्वाचन आयोगले आन्तरिक तयारीका लागि संघीय तथा प्रदेश सभा सदस्य निर्वाचनको कार्यतालिका स्वीकृत गरेको छ । कार्यतालिकामा मंसिर ४ गते हुने निर्वाचनका लागि कुन दिन के काम गर्ने भनेर उल्लेख गरिएको छ ।

कार्यतालिका अनुसार असोज ११ गते निर्वाचन अधिकृत नियुक्ति गरिनेछ भने असोज २१ गते कार्यालय स्थापना र असोज २३ गते मनोनयन गर्दाको कार्यक्रम तय गरिएको छ । आयोगको कार्यतालिका अनुसार दसैंको पूर्णिमाको दिन उम्मेदवारी दर्ता हुने भएको छ ।

अन्तिम नामावली प्रकाशन असोज २६ गते प्रकाशन हुने छ । समानुपातिक तर्फको बन्द सूची पेस गर्ने कार्यतालिका भने असोज २ र ३ गतेका लागि तय गरिएको छ । जसअनुसार प्रतिनिधिसभा र प्रदेशसभाको कार्यकाल आगामी असोज १ सम्म मात्रै कायम रहने भएको छ ।

असोज २८ गतेदेखि मतपत्र छपाइ सुरु हुने छ । मङ्सिर १ गते राति १२ बजेदेखि प्रचारप्रसारमा रोक लगाइने छ । मङ्सिर ४ गते बिहान सात बजेदेखि पाँच बजेसम्म मतदान हुनेछ ।

२७५ सदस्यीय प्रतिनिधिसभामा ११० जना समानुपातिक प्रणालीबाट चुनिन्छन् । १ सय ६५ वटा निर्वाचन क्षेत्रबाट भने प्रत्यक्ष चुनाब जितेर आउनेछन् ।

आयोगले साउन १९ सम्म दर्ता भएका ११६ दललाई निर्वाचन प्रयोजनका लागि दर्ता गर्ने प्रक्रिया सुरु गरेको छ । सोमबारसम्म ९ वटा दलले दर्ताका लागि निवेदन दिइसकेको आयोगले जनाएको छ । दल दर्ताको अवधि साउन ३१ सम्म छ । निवेदनमाथि छानबिन भने साउन १ देखि ७ सम्म हुने आयोगले जनाएको छ । दल दर्ता स्वीकृति भदौ ८ मा हुनेछ ।

क्याटेगोरी : समाचार
ट्याग : #निर्वाचन आयोग, #निर्वाचन कार्यतालिका स्वीकृत