श्रममन्त्री कुँवर र जापानका सहायक उपमन्त्री नाकागावाबीच भेटवार्ता

साझा पाना २०७९ साउन १९ गते १८:५२ मा प्रकाशित

काठमाडौँ । श्रम रोजगार तथा सामाजिक सुरक्षा मन्त्री शेरबहादुर कुँवरले जापानका सहायक उपमन्त्री चोतुमो नाकागावासँग भेटवार्ता गर्नु भएको छ । बैठक पछि मन्त्रालयमा भएको भेटमा नेपाली भाषा परीक्षा पास भएका र सिप सिकेर बसेका नेपाली कामदारलाई जापान पठाउने प्रक्रियाका विषयमा छलफल भएको छ ।

मन्त्री कुँवरले ५ हजार बढी नेपालीहरू जापान जानको लागि तयारी अवस्थामा रहेका जानकारी गराउनु भएको थियो । उहाँले उपमन्त्री चोतुमोलाई नेपाली कामदारलाई जापान पठाउनका लागि समझदारी पत्रमा हस्ताक्षर गर्न अनुरोध गर्नु भएको छ । साथै उहाँले दुई देशबीचको समस्यालाई समाधान गरी मित्रवत् सम्बन्ध स्थापित गर्नुपर्ने बताउनु भयो ।

भेटमा उपमन्त्री चोतुमोले आजको गोष्ठी नेपाली कामदार जापान लैजानका लागि सकारात्मक भएको विश्वास व्यक्त गर्नु भएको छ । उहाँले अहिले जापानमा कामदारको माग धेरै भएकाले (एसएसडब्लू) मार्फत ५ हजार बढी नेपाली कामदार लिनका लागि जापान तयार भएको र श्रम सम्झौतामा ढिलाइ भएकाले यो सम्झौता चाडों होस् भन्ने आफूले चाहेको बताउनु भएको थियो ।

चोतुमोले नेपाली कामदारलाई जापान लैजान भइरहेका समस्या समाधान गरी रोजगारीको बाटो खुल्ला गर्न आफूले पहल गर्ने बताउनु भयो ।

क्याटेगोरी : समाचार
ट्याग : #शेरबहादुर कुँवर