वीरगञ्जको मुख्य बजार जलमग्न

साझा पाना २०७९ असार ६ गते १७:०६ मा प्रकाशित

वीरगञ्ज । आज दिउँसो परेको एक घण्टाको पानीले वीरगञ्जको मुख्य बजार जलमग्न भएको छ । साँढे दुई बजेदेखि एक घण्टा परेको अविरल वर्षाको कारण वीरगन्जका अधिकांश क्षेत्र जलमग्न भएको हो ।

अविरल वर्षाको कारण वीरगञ्ज नगर क्षेत्रको अधिकांश भाग डुबानमा परेपछि जनजीवन समेत प्रभावित बन्यो । वीरगञ्जको आदर्शनगर, भाजुरत्न चोक, कर कार्यालयको ऐरिया, रामगढवा, रानीघाट, जेलरोड, गणेशमान चोक, पानीटंकी, भिषुवा, छपकैया, मुर्लि, श्रीपुर, चिनी मिल आवास क्षेत्र लगायतका क्षेत्रमा पानी जमेको कारण सडक तथा आसपासका सयौँ घरहरूमा पानी पसेको छ ।

वीरगञ्जको आदर्शनगर स्थित कैलाश होटलचोक, गीता मन्दिर चोक अगाडीको सडक खण्डमा झण्डै ३ फिट भन्दा बढी पानी जमेको ट्रान्सपोर्ट व्यवसायी हरेन्द्र साहले बताउनुभयो ।

त्यसैगरी जिल्ला प्रशासन कार्यालय पर्सा परिसरमा झण्डै ३ फिट पानी जमेको कारण आवतजावत गर्न समस्या भएको छ ।

क्याटेगोरी : समाचार, स्थानीय
ट्याग : #वीरगञ्ज