अमेरीकी नागरिकले चलाएको अन्धाधुन्ध गोली प्रहारबाट सङखुवासभा खाँदबारी नगरपालिका ६ का सागर घिमिरेको मृत्यु भएको छ । अमेरिकाको बाल्टिमोरमा शनिबार एक व्यक्तिले गरेको आगजनी र अन्धाधुन्ध गोली प्रहारमा घिमिरेको ज्यान गएको हो ।

प्रहरीका अनुसार ५६ वर्षीय एभर्टन ब्राउनले आफ्नो घरमा आगो लगाएपछि अन्धाधुन्ध गोली चलाएका थिए। घटनामा नजिकैको घरमा बस्ने संखुवासभाको खाँदबारी स्थायी घर भएका २७ वर्षीय सागर घिमिरेको ज्यान गएको हो । घटनामा अन्य तीन जनाको पनि ज्यान गएको छ । प्रहरी कारबाहीमा पछि ब्राउन मारिएका थिए । घिमिरे केहि समय अघिमात्र साउथ क्यारोलाइना स्थित क्लाफ्नि युनिभसिटिबाट कम्प्युटर साइन्समा स्नातक गरेको मृतक घिमिरेका सहोदर काका कप्तान घिमिरेले बताए ।

मृतक घिमिरे नेपालीको घरमा बस्दै आएका थिए । घर जले पछि घरमा भएको सामान निकालेर गाडीमा राख्दै गर्दा घिमिरेलाई गोली लागेको बाल्टिमोर एशोसियसन अफ नेपलिज अमेरीकाका पूर्वमहासचिव तथा पत्रकार गौतम दाहालले बताए ।

चार वर्षअघि अमेरिका गएका सागरले केही समयअघि मात्र स्नातकको पढाइ सकेका थिए । उनले छात्रवृत्तिमा क्लाफिन युनिभर्सिटीमा पढेका थिए । सागरका दाजु र बुबा खाँदबारीमा बस्छन् । आमाको केही समयअघि मृत्यु भएको थियो। दाजु अशक्त छन् ।

क्याटेगोरी : समाचार, देश परदेश

---

---

---