प्रजातन्त्र दिवसको अवसरमा संखुवासभा कारागारका ७ कैदी छुटे

साझा पाना २०७७ फागुन ७ गते १७:५६ मा प्रकाशित

खाँदबारी : संखुवासभा जिल्ला कारागारबाट प्रजातन्त्र दिवसको अवसरमा ७ जना कैदी छुटेका छन् । कैद कट्टी नियमावली बमोजिम मापदण्ड पूरा गरेका उनीहरुलाई सरकारले प्रजतन्त्र दिवसको अवसरमा बाँकी कैद मिनाहा गरेर रिहा गरेको हो ।

रिहा हुनेहरुमा धर्मदेबी नगरपालिका १ का चिरन्जिबी अधिकारी, लक्ष्मण राई मकालु गाउँपालिका ४, केदार पन्त सभापोखरी, ईन्द्र तामांग मकालुगाउपालिका, धनबहादुर राई चिचिला गाउँपालिका, कमल बहादुर दाहाल चैनपुर नगरपालिका र मदन कुमार लिम्बु तेरथुमका रहेको जिल्ला कारागार संखुवासभाका जेलर बिनोद अधिकारीले जानकारी दिनुभयो । प्रक्रिया पूरा गरी उनीहरुलाई आफन्तको जिम्मा लगाइएको जेलर अधिकारीले बताउनुभयो ।

सरकारको सिफारिसमा राष्ट्रपतिले संविधान दिवस तथा गणतन्त्र दिवसको दिन जघन्य अपराध गरेकाबाहेक अन्य प्रकृतिका कैदीहरुको ५० प्रतिशत कैदी मिनाहा भएका र अन्य चालाचलन राम्रो भएको मूल्यांकनको आधारमा बाँकी कैद मिनाह गरेर रिहा गरिँदै आएको छ ।

प्रजातन्त्र दिवसको अवसरमा जिल्ला स्वास्थ कार्यालय र जिल्ला अस्पताल संखुवासभाको समन्वयमा जिल्ला कारागारमा कैद भुक्त्तान गर्दै आएका एक सय तेत्तिस जना कैदीबन्दीहरुको स्वास्थ परिक्षण समेत गरिएको छ । कैदीहरुको क्षयरोग, जन्डिस, ब्लडप्रेसर सुगर लगायतका स्वास्थ परिक्षण गरिएको जेलर अधिकारीले बताउनुभयो ।

क्याटेगोरी : समाचार
ट्याग : #जिल्ला कारागार संखुवासभा, #संखुवासभा