चितवनमा बन्दको प्रभाव न्युन: प्रहरीको स्कटिङ्ग तीब्र

प्रनिश थापा चितवन संवाददाता २०७७ माघ २२ गते १३:११ मा प्रकाशित

चितवन । सरकारले संवैधानिक निकायहरूमा नियुक्ति लगायतका कामहरु गरेको भन्दै दाहाल–नेपाल समूहले आज (बिहीबार) आव्हान गरेको नेपाल बन्दको प्रभाव चितवनमा समेत परेको छ ।

जिल्ला प्रशासन कार्यालय चितवनले निर्वाध रूपमा सवारीसाधन सञ्चालन गर्न यातायात व्यवसायीहरुलाई निर्देशन दिएपनि ठाउँठाउँमा खटिएका बन्दकर्ताहरुले सवारीसाधन चल्न दिएनन् । जसले गर्दा टाढाटाढाबाट आएका यात्रु र सवारी साधनहरु बीच बाटोमा नै अलपत्र हुनुपरेको थियो ।

यसैलाई मध्ययनजर गर्दै चितवन प्रहरीले स्कटिङमार्फत सयौं सवारीसाधनलाइ आ आफ्नो गन्तव्यमा पुर्‍याउन समेत सफल भएको छ । जिल्ला प्रहरी कार्यालय चितवनका (एसपी) नान्तिराज गुरुङको निर्देशनमा पुर्वीचितवन र केही भागमा मध्यान्ह १२ बजे देखि नै सवारीसाधन सञ्चालनमा आएको थियो ।

एसपी गुरुङको निर्देशन पाएलगत्तै टाँडीबाट डिएसपी रविन कार्की र जिल्लाबाट प्रहरी निरीक्षक स्याम कुमार बस्नेतको कमान्डमा ठुलो संख्यामा प्रहरी राजमार्ग खुलाउन तर्फ परिचालित थिए । उनीहरुलाइ सम्झाइ बुझाइ गरेको भए पनि अटेर गरे पछि प्रहरीले सामान्य बल प्रयोग गरेको थियो ।

त्यसबाहेक आज चितवन दिनभरजसो शान्त नै रह्यो । नेपाल बन्दका क्रम्मा हुन सक्ने संभावित दुर्घटनालाइ मध्ययनजर गर्दै चितवन प्रहरीले ठुलो संख्यामा नेपाल प्रहरी र सशस्त्र प्रहरीलाई ठाउँठाउँमा परिचालन गरेको थियो । बन्दकर्तालाइ प्रहरीले खेदेपछि रत्ननगरमा ३ बजे नै बन्द फिर्ता लिन बन्दकर्ता बाध्य भए भने भरतपुर र नारायणगढ क्षेत्रमा भने दिउँसो ४ बजेपछि अबरुद्ध राजमार्ग सञ्चालनमा आएको थियो ।