बाँदर र कृषकबीच सन्तुलन कायम गर्न विष्णु खड्काको जन्मदिनमा अनौठो प्रयास

साझा पाना २०८१ चैत्र २१ गते १२:१९ मा प्रकाशित

जीवनराज दाहाल
(चैत्र २१, बर्दिवास)

अधिकांश व्यक्तिहरू आफ्नो जन्मदिन नाचगान, केक काट्ने र भोज आयोजना गर्दै मनाउने गर्छन् । तर, बर्दिवास उद्योग वाणिज्य संघका अध्यक्ष तथा समाजसेवी विष्णु खड्काले भने यस वर्ष आफ्नो जन्मदिन फरक शैलीमा मनाएका छन् । उनले बर्दिवासदेखि पश्चिम लक्ष्मनिया क्षेत्रसम्म फैलिएको जङ्गलमा रहेका बाँदरहरूलाई झण्डै ३०० किलो फलफूल तथा खाद्यान्न वितरण गरेका छन् ।

उनले बाँदरहरूलाई सुन्तला, जुनार, स्याउ, अङ्गुर, केरा, आँप, भुजा, बिस्कुट लगायतका खाद्य सामग्री बाँडेका थिए । यस कार्यको मुख्य उद्देश्य बाँदर व्यवस्थापनप्रति समाज र सम्बन्धित निकायको ध्यानाकर्षण गराउनु रहेको खड्काले बताए ।

उनका अनुसार पछिल्लो समय बर्दिवास नगरपालिकाको उत्तरी क्षेत्रमा बाँदर आतङ्क दिनप्रतिदिन बढिरहेको छ । बाँदरका कारण घरको करेसाबारी, खेतबारीमा लगाइएका अन्नबाली तथा फलफूल बगैंचामा क्षति पुग्ने गरेको स्थानीयले गुनासो गर्दै आएका छन् । पहाडी जिल्लाहरूमा बाँदर नियन्त्रणका लागि सरकारले विशेष बजेट छुट्याएझैँ बर्दिवास क्षेत्रमा पनि यसको व्यवस्थापनको आवश्यकताको महसुस खड्काले गरेका छन् ।

“बाँदरहरूको पनि बाँच्न पाउने अधिकार खोस्नु हुँदैन, तर मानिसहरूले सुरक्षित तरिकाले अन्नबाली उत्पादन गर्न पाउने वातावरण पनि हुनुपर्छ । सम्बन्धित निकायको ध्यानाकर्षण गराउन तथा समाधानको पहलका लागि मैले जन्मदिनलाई यस्तो नयाँ तरिकाले मनाउने निर्णय गरेको हुँ,” खड्काले बताए।