दक्षिण पूर्व एशिया देश कोभिड १९ विरूद्ध एकजुट

साझा पाना २०७७ भदौ २६ गते १०:३१ मा प्रकाशित

काठमाडौँ,ः विश्व स्वास्थ्य संगठन (दक्षिण पूर्व एशिया)को ७३ औं क्षेत्रीय समितिको बैठकले कोरोना भाइरस (कोभिड १९) का विरूद्ध साझा प्रतिकार्य गर्ने प्रतिवद्धता व्यक्त गरेका छन ।

हिजो (बुधबार) र आज विहीबार भएको बैठकले कोभिड १९ का विरूद्ध दक्षिण पूर्वी एसियाका ११ देशले साझा प्रतिकार्य गर्ने प्रतिवद्धता व्यक्त गरेका हुन ।

बैठकमा सहभागिले क्षेत्रीय स्तरमा स्वास्थ्यका क्षेत्रमा भएका प्रगति तथा चुनौतीमाथि छलफल भएको थियो । कोभिड १९ महामारीको रोकथाम तथा नियन्त्रण गर्ने रणनीति, आवश्यक स्वास्थ्य सेवा सुचारु राख्ने उपाय र नव सामान्यीकरण तर्फ अगाडि बढ्न सघाउने कदमहरूबारेका समेत विशेष छलफल भएको थियो ।

कोभिड १९ को रोकथाम र नियन्त्रणका लागि हालसम्म अपनाइएका प्रयास तथा चुनौती र आगामी कार्यदिशाका बारेमा एघार वटा देशले आआफ्नो अनुभव र योजना आदानप्रदान गरेका थिए ।

बैठकलमा स्वास्थ्य जनशक्तिको सुदृढीकरण दशकमा हालसम्म भएका प्रगति तथा चुनौतीहरु, क्षमता तथा अवसरहरूको मध्यावधि समीक्षा र स्वास्थ्य सेवामा सर्वव्यापी पहुँच र स्वास्थ्य सम्बन्धी दिगो विकास लक्ष्यहरूका दिशामा भएका प्रगति समेटिएको वार्षिक प्रतिवेदन क्षेत्रीय निर्देशक डा पुनम सिंहले उक्त बैठकका प्रस्तुत गर्नु भएको थियो ।

यस्तै बैठकमा यस क्षेत्रका प्रमुख प्राविधिक विषयमा हरेक देशले आआफ्नो देशमा भए गरेका कार्यको जानकारी दिनुका साथै सुधारका पक्षका बारेमा विश्व स्वास्थ्य संगठन र स्वास्थ्य समुदायलाई रचनात्मक सुझावहरू दिएका थिए ।

प्राविधिक विषयहरूमा शारीरिक सक्रियता र गतिविधिहरूको प्रवर्धन गर्ने, रक्सीको हानिकारक प्रयोग घटाउने, औषधीहरूमा सबैको पहुँच सुनिश्चित गर्ने, डेंगू नियन्त्रण गर्ने र मलेरिया, दादुरा र रुबेला उन्मूलन गर्ने जस्ता क्षेत्रीय समितिका पूर्व प्रतिबद्धता तथा निर्णयहरूको कार्यान्वयनमा विषयमा समेत छलफल भएको थियो ।

बैठकमा माल्दिभ्सले रूवेला उन्मुलन, म्यानमारले ट्रकोमा नियन्त्रण र श्रीलंकाले रूवेला उन्मुलन र आमाबाट नवजातमा सर्ने एचआईभी उन्मूलन गर्ने प्रतिवद्धता व्यक्त गरेका थिए ।

बैठकको अध्यक्षता थाइल्याण्डका उप प्रधानमन्त्री तथा जनस्वास्थ्य मन्त्रीज्यूले गर्नु भएको थियो भने नेपालका स्वास्थ्य तथा जनसंख्या भानुभक्त ढकालले सहअध्यक्षता गर्नु भएको थियो ।

थाईल्याण्डमा आयोजना हुनुपर्ने यस बैठकलाई कोभिड महामारीका कारण पहिलो पटक भर्चुअल रूपमा सञ्चालन गरिएको थियो ।

दुई दिनेचलेको बैठकमा विश्व स्वास्थ्य संगठनका महानिर्देशक, डा. टेड्रोस अधानोम गेब्रेयेसुस, विश्व स्वास्थ्य संगठन ( दक्षिण पूर्व एशिया)का क्षेत्रीय निर्देशक, डा. पुनम क्षेत्रपाल सिंह, यस क्षेत्रका ११ सदस्य राष्ट्रका स्वास्थ्य मन्त्री तथा वरिष्ठ स्वास्थ्य अधिकारीको सहभागिता रहेको थियो ।

आगामी बर्ष दक्षिण पुर्बी एसिया क्षेत्रको ७४ बैठक सन् २०२१ को सेप्टेम्बरमा नेपालमा आयोजना हुने छ । शरद शर्मा

क्याटेगोरी : स्वास्थ्य
ट्याग : #कोभिड १९