तोयाराज घिमिरेको स्मृतिमा साहित्यिक कार्यक्रम सम्पन्न

साझा पाना २०८१ चैत्र १६ गते १९:२० मा प्रकाशित

बर्दिबास, १७ चैत्र ।
बर्दिवास छन्द चौतारीको आयोजनामा कीर्तिशेष कवि तोयाराज घिमिरेको तेस्रो स्मृति दिवस एक साहित्यिक कार्यक्रमसहित सम्पन्न गरिएको छ। प्रमुख अतिथि नेकपा एमाले केन्द्रीय सल्लाहकार सरिता ढुङ्गाना र विशिष्ट अतिथि प्रगतिशील लेखक संघ (प्रलेस) का मधेस प्रदेश अध्यक्ष नारायण घिमिरेको विशेष उपस्थितिमा कार्यक्रम सम्पन्न भएको हो । कार्यक्रमको अध्यक्षता प्रेम घिमिरे ‘अग्निकवच’ ले गरेका थिए ।

गौरीशङ्कर होटलको सभा कक्षमा सम्पन्न कार्यक्रममा जानकी नारी समाजकी अध्यक्ष मञ्जु मञ्जुभाषिणी, मिथिला साहित्य प्रतिष्ठान धनुषाका अध्यक्ष विपीराज दहाल, बुढ्यौली साहित्य समाज धनुषाका अध्यक्ष नानीराम दहाल, विश्व नेपाली साहित्य महासंघ महोत्तरीका अध्यक्ष उद्धव अविचल, नारी श्रष्टा समाज महोत्तरीकी अध्यक्ष जमुना पोख्रेल, सर्लाही साहित्य समाजकी उपाध्यक्ष राजेश्वरी काफ्ले लगायतका साहित्यकारहरूले तोयाराज घिमिरेको साहित्यिक योगदान र सामाजिक जीवनका विविध पक्षमाथि चर्चा गर्दै कविता, मुक्तक तथा गीत वाचन गरेका थिए ।

गौरीशङ्कर मिथिला वाङ्मय प्रतिष्ठानकी सल्लाहकार मिना देवकोटा, सदस्यहरू सुमित्रा आचार्य र प्रवीणा पल्लवी, लोकदोहोरी गीत प्रतिष्ठान मधेस प्रदेश अध्यक्ष रुद्रसेन बि.क. लगायतका वक्ताहरूले तोयाराज घिमिरेप्रति श्रद्धा प्रकट गर्दै उहाँको व्यक्तित्व र कृतित्वमाथि प्रकाश पारे ।

प्रमुख अतिथि ढुङ्गानाले तोयाराज घिमिरेको सरल जीवनशैली र उच्च विचारको खुलेर प्रशंसा गर्दै उहाँको पारिवारिक अवस्थाको चर्चा गरिन् । विशिष्ट अतिथि नारायण घिमिरेले स्वर्गीय तोयाराज घिमिरेको उच्च साहित्यिक क्षमताबारे चर्चा गर्दै, “यदि उहाँ बाँचिरहनुभएको भए, नेपाली साहित्यको बगैचामा अझ धेरै सिर्जनाहरू फक्रिन सक्थे,” भन्ने धारणा राखे ।

कार्यक्रमका सभापति प्रेम घिमिरे ‘अग्निकवच’ ले तोयाराज घिमिरेसँग बिताएको सीमित समय सम्झँदै उहाँबाट सिक्न पाइने धेरै अवसरहरू गुमाएकोमा खिन्नता व्यक्त गरे । उनले तोयाराज घिमिरे अल्पायुमै कविता, उपन्यास, नाटक, रेडियो कार्यक्रम लेखन र पत्रकारितामा कलम चलाउन सफल भएको स्मरण गराए ।

कवयित्री शान्ता काफ्लेको सञ्चालनमा सम्पन्न कार्यक्रममा सर्लाही, महोत्तरी र धनुषाका विभिन्न साहित्यकारहरूको उल्लेखनीय उपस्थिति रहेको थियो ।

स्व. तोयाराज घिमिरे राजर्षि जनक विद्यापीठ, जनकपुरमा माध्यमिक तहको नेपाली विषयका शिक्षक हुनुहुन्थ्यो । उहाँ राजर्षि जनक वाङ्मय प्रतिष्ठानको अध्यक्ष, डा. राजेन्द्र विमल प्रतिष्ठानको महासचिव तथा अन्तर्राष्ट्रिय नेपाली साहित्य समाज मधेस प्रदेश इन्चार्जको रूपमा समेत सक्रिय हुनुहुन्थ्यो । २०७८ साल चैत्र १६ गते ४९ वर्षको उमेरमा क्यान्सरका कारण उहाँको निधन भएको थियो । उहाँका श्रीमती, दुई छोरी र एक छोरा छन् ।