काठमाण्डौ । साताको अन्तिम कारोबार दिन आज नेपाल स्टक एक्सचेञ्च (नेप्से) मा दोहोरो अंकको गिरावट आएको छ । आज नेप्से परिसूचक १.१९ प्रतिशत अर्थात ३१.४३ अंकले घटेर २ हजार ५९६.८२ विन्दुमा सीमित बनेको छ ।

यो दिन बलिया र राम्रा कम्पनीको मापक सेन्सेटिभ इन्डेक्स पनि ०.९६ प्रतिशतले घटेर ४४५.७७ विन्दुमा खुम्चिएको छ । यो दिन नेप्सेमा सूचीकृत मध्ये ३१० वटा स्क्रिप्टको ९८ लाख ३२ हजार ३०८ कित्ता सेयर ४ अर्ब ७६ करोड २ लाख रुपैयाँभन्दा बढीको कारोबार भएको  छ ।

आजको बजारबारे अर्थशास्त्री सूर्यनारायण पौडेल भन्छन्,  ‘राजनीतिक अन्यौलतका कारण नै पछिल्लो समय बजारमा करेक्सन आएको छ । राजनीतिक स्थिरता कायम नएभसम्म आर्थिक स्थिरता हुँदैन ।’

आजको बजारको घटाईको मुख्य कारण प्यानिक सेल नै रहेको उनले बताए । यद्यपी मध्य र दीर्घकालका लागि भने लगानीको अवसर नै रहेको बताउँदै उनले लगानीकर्ता डराउनु पर्ने अवस्था नभएको बताए ।

उनले अहिले नै बजारमा पुस मसान्तको दबाब नआईसकेको समेत दाबी गरे । ‘बजारमा नयाँ कर्जा नजानु र निर्माण व्यवसायीलाई दिएको सहुलियत नविकरण नहुनुले बजारमा बिक्री दबाब आएको हुनसक्छ ।’

त्यस्तै अर्का बजार जानकार शालीग्राम ढकाल भन्छन्, ‘सरकार परिवर्तनको हल्ला फैलिदा लगानीकर्ता पर्ख र हेरको अवस्थामा रहेका कारण बजारले पछिल्लो समय गति लिन सकेको छैन । कम्पनीहरुको लाभांश घोषणा राम्रो नआउनु र २६ सय विन्दुभन्दा तल खस्दा बजारमा बिक्री दबाब आएको छ ।’

यो दिन नेप्सेमा सूचीकृत १३ वटै समूहमा रातो पोतियो । आज व्यापार समूह सर्वाधिक अर्थात २.७३ प्रतिशतले घटेको छ । बैंकिङ समूह पनि आज ०.८२ प्रतिशत,विकास बैंक १.२५, फाइनान्स २.३१, होटल ०.८७,हाईड्रो १.५२,लगानी १.९५,जीवन बीमा १.०४,उत्पादन तथा प्रशोधन ०.३३, लघुवित्त ०.७१,म्युचुअल फण्ड ०.२६,निर्जीवन बीमा १.०५ र अन्य समूह ०.९३ प्रतिशतले घट्यो ।

धेरै कारोबार गर्ने कम्पनीहरु

यो दिन जानकी फाइनान्सको सर्वाधिक सेयर कारोबार भयो । आज यो कम्पनीको १७ करोड ६० लाख बढीको कारोबार भयो । कर्णाली डेभलपमेन्ट बैंकको आज ११ करोड ४५ लाख,नेपाल फाइनान्सको १० करोड २२ लाख,एनआरएन इन्फ्रास्ट्रक्चरको ८ करोड ६ लाख र जोशी हाईड्रोपावरको ७ करोड ७२ लाख बढीको सेयर कारोबार भयो ।

धरै कमाउने र गुमाउने कम्पनीहरु

आज नेप्सेमा कारोबार भएका एउटा कम्पनीको सेयरमूल्यमा मात्रै अपर सर्किट लाग्यो । आज सामूदायिक लघुवित्तको सेयरमूल्य ७.९६ प्रतिशत,भूगोल इनर्जीको ५.०९,मेन्छियाम हाईड्रोपावरको ४.५० र आत्मनिर्भर लघुवित्तको सेयरमूल्य ४.३९ प्रतिशतले बढ्यो ।

यो दिन नारायणी डेभलपमेन्ट बैंकको सेयरमूल्य सबैभन्दा धेरै अर्थात ९.२१ प्रतिशतले घट्यो । माईखोला हाईड्रोपावरको सेयरमूल्य पनि आज ६.६३ प्रतिशत,मानुषी लघुवित्तको ५.८० र रिभर फल्स पावरको ५.७८ प्रतिशतले घट्यो ।

क्याटेगोरी : अर्थ
ट्याग : #‘राजनीतिक अन्यौलता मुख्य कारण’, #breaking, #जानकार भन्छन्, #निरन्तर ओरालो लाग्दै नेप्से

---

---

---