छहरे, नुवाकोट । राष्ट्रिय स्वतन्त्र पार्टीका सभापति रवि लामिछानेलाई प्रहरीले हिरासतमा लिएको छ। लामिछानेले चैत्र २३ गते शनिबार नुवाकोट हुँदै चितवन जाने कार्यक्रम तय गरेका थिए। नुवाकोटको छहरे बजारमा पार्टी कार्यकर्ताले उहाँको स्वागत गर्ने तयारी गरेका थिए, तर हिजो राति गिरफ्तारी भएपछि उक्त कार्यक्रम नहुने भएको हो ।

 

उनी आज नुवाकोट हुँदै चितवन जाने रास्वपा नुवाकोटका उपाध्यक्ष शरण महतले बताएका थिए। महतले फेसबुकमा लेखेका थिए, “राष्ट्रिय स्वतन्त्र पार्टीका सभापति रवि लामिछाने २०८१ चैत्र २३ गते शनिबार “जनयात्रा” कार्यक्रमको सुरु गर्न नुवाकोट हुँदै चितवन जाँदै हुनुहुन्छ। यसै अवसरमा राष्ट्रिय स्वतन्त्र पार्टी नुवाकोटले छहरेमा पार्टी सभापतिलाई स्वागत गर्दै उहाँको यात्रामा सहभागी हुनेछ। सबैजना बिहान ७ बजे छहरेमा भेला हुन आउनुहोला ।”

नुवाकोटका कार्यकर्ताहरूले लामिछानेलाई स्वागत गर्न बिहान छहरे बजारमा उपस्थित हुन जुट्दै थिए।। त्यसपछि कार्यकर्ताले विदुर गल्छी हुँदै चितवन पठाउने तयारी गरेका थिए।

लिखु गाउँपालिकाका स्थानीय उमेश पाठकले शनिबार बिहान फेसबुक मार्फत प्रतिक्रिया गर्दै भने, “खै त रवी दाई आइपुग्नु भएन! कता स्वागत गर्ने होला?” उनले लीखुका नेता विष्णुकुमार श्रेष्ठको स्ट्याटसमा प्रतिक्रिया जनाएका हुन् ।

हिजो साँझ नै लामिछानेले फेसबुकमा पोस्ट गर्दै गिरफ्तारी दिने र सर्वोच्चमा अपिल गर्ने संकेत गरेका थिए । “म माथि ठुलो अन्याय भएको छ। चितवनको सभा निर्धारित समय र स्थानमा हुनेछ।” आज निर्धारित चितवनको सभा भने हुने बताइएको छ।

क्याटेगोरी : समाचार
ट्याग : #breaking, #नुवाकोट हुँदै चितवन जाने भनिएका रवि लामिछाने प्रहरी हिरासतमा

---

---

---