ट्रम्प र जेलेन्स्कीबीच आज भेटवार्ता, युक्रेनको खनिज खानीमा अमेरिकी पहुँचबारे सम्झौता सम्भावित

काठमाडौं । अमेरिकी राष्ट्रपति डोनाल्ड ट्रम्प र युक्रेनी राष्ट्रपति भ्लोदोमिर जेलेन्स्कीबीच आज ह्वाइटहाउसमा भेटवार्ता हुँदैछ। यो वार्ता मुख्य रूपमा युक्रेनका खनिज स्रोतमा अमेरिकी पहुँच सुनिश्चित गर्ने विषयमा केन्द्रित हुनेछ। यसअघि नै अमेरिका र युक्रेनबीच खनिज सम्बन्धी प्रारम्भिक सहमति भइसकेको छ।

भेटवार्ताअघि ट्रम्पले जेलेन्स्कीको प्रशंसा गरेका छन्। केही दिनअघि जेलेन्स्कीलाई ‘तानाशाह’ भनेका ट्रम्पले अहिले आफ्नो बयान फेर्दै, ‘मैले त्यस्तो भनेँ र? मलाई विश्वास नै छैन,’ भन्दै नयाँ धारणा प्रस्तुत गरेका छन्। पत्रकारहरूसँगको कुराकानीमा उनले जेलेन्स्कीप्रति सम्मान व्यक्त गरेका छन्।

जेलेन्स्कीको कार्यकाल गत मे महिनामा सकिए पनि रुससँगको युद्धका कारण निर्वाचन हुन सकेको छैन। हाल ‘मार्शल ल’ अन्तर्गत उनले सरकार सञ्चालन गरिरहेका छन्। यही कारण ट्रम्पले उनलाई पहिले ‘तानाशाह’ भनेका थिए, तर अहिले उनले जेलेन्स्कीलाई ‘बहादुर नेता’ भन्दै प्रशंसा गरेका छन्।

बीबीसीका अनुसार ट्रम्पले भने, ‘हामीबीच राम्रो वार्ता हुनेछ। हामी मिलेर काम गर्नेछौं। उनले युद्धमा बहादुरीपूर्वक लडेका छन्। अमेरिका युक्रेनलाई धेरै सहायता प्रदान गरिसकेको छ।’

रुस–युक्रेन युद्ध सन् २०२२ फेब्रुअरी २४ देखि जारी छ। तर, यसको जरो सन् २०१४ मा क्रिमिया र रुस समर्थित विद्रोहीहरूको गतिविधिसँग गाँसिएको छ। यस द्वन्द्वले विश्व अर्थतन्त्र, ऊर्जा आपूर्ति र सुरक्षा मामिलामा ठूलो प्रभाव पारेको छ।

ट्रम्पले हालै युद्ध अन्त्य गर्न पहल लिने संकेत दिएका छन्। ओभल अफिसमा बेलायती प्रधानमन्त्री किर स्टार्मरसँगको संयुक्त पत्रकार सम्मेलनमा उनले जेलेन्स्कीलाई ह्वाइटहाउसमा स्वागत गर्ने घोषणा गरे। भेटपछि अमेरिका र युक्रेनबीच खनिज आपूर्तिसम्बन्धी सम्झौतामा हस्ताक्षर हुने तय भएको छ।