ऊर्जामन्त्री भन्छन्- कुलमानले सरकारलाई टेरेनन्, अराजक गतिविधि हेरेर बस्दैनौं

साझा पाना २०८१ फागुन ६ गते १५:३४ मा प्रकाशित

काठमाडाैं । उर्जा, जलस्रोत तथा सिंचाइमन्त्री दीपक खड्काले विद्युत् प्राधिकरणका कार्यकारी निर्देशक कुलमान घिसिङ आफुखुसी ढंगले अघि बढ्न खोजको बताएका छन् ।

मंगलबार बसेको प्रतिनिधिसभाको बैठकमा बोल्दै मन्त्री खड्काले सञ्चालक समितिले गरेको निर्णय कार्यान्वयन नगरेर घिसिङ आफुखुसी ढंगले अघि बढ्न खोजको र सरकारलाई नटेरेको बताएका छन् ।

उनले घिसिङको अराजक गतिविधिलाई सरकारले हेरेर नबस्ने र लगाम लगाउने उल्लेख गरे । राम्रो कामलाई पुरस्कार दिने भन्दै उहाले सरकारका एउटा कर्मचारीको पक्षमा एक भएर बोल्नुपर्ने कुनै कारण नरहेको जिकिर गरे । मन्त्री खड्काले पटक पटक बोर्ड बैठक बोलाउँदा उपस्थित नभएपनि सदस्य परिवर्तन गर्नुपरेको स्पष्ट पारे ।

उनले कुलमानका कारण लोडसेडिङ हटेको भन्दै भ्रम फैलाइएको उल्लेख गर्दै तत्कालीन अवस्थामा ४२५ मेगावाट विद्युत् भारतबाट ल्याउँदा लोडसेडिङ हटेको स्पष्ट पारे । उनले बाढीका कारण १३ अर्बको क्षति भएको भन्दै तत्कालको अवस्थामा विद्युत प्रवाहलाई सहज ढंगले सूचारु गरिएको दाबी गरे ।

उनले दोधारा लम्की, बरेली, ढल्केबरलगायत आठवटा अन्तरदेशीय प्रसारण लाइन निर्माण गर्ने गरी भारत सरकारसँग सम्झौता भइ काम अघि बढेको बताए ।

उनले ऊर्जा क्षेत्रमा आवश्यक कानून तर्जुमाका क्रममा रहेको र केहि विधेयकहरु अघि बढिसकेको जानकारी दिए । त्यस्तै, उनले जगदुल्ला जलविद्युत आयोजनाको ठेक्का प्रकरणमा आफ्नो कुनै संलग्नता नभएको प्रष्टीकरण दिएका छन् ।

प्रतिनिधि सभाको बैठकमा बोल्दै उनले नेकपा माओवादी केन्द्रका अध्यक्ष पुष्पकमल दाहाल प्रचण्डलाई आफूमाथि लागेको आरोपको चुनौती दिए ।

गत साता प्रचण्डले सदनलाई सम्बोधन गर्दै जगदुल्ला हाइड्रोपावरमा १६ अर्बको ठेक्कामा ऊर्जा मन्त्री यसैगरी जोडिएको आरोप लगाएका थिए । उनले विगत ८ वर्षदेखि उर्जा मन्त्रालय माओवादीको नेतृत्वमा सञ्चालन भइरहेको भन्दै तपाईंहरुको पालामा यस्तै गरिन्छ त ? भन्दै प्रश्न गरे ।

उनले भने, ‘यति ठूला नेताहरुलाई शब्द प्रयोगमा पनि ख्याल गर्न आग्रह गर्छु । सम्मानित नेताहरुलाई मैले कसरी उत्तर दिने मलाई च अचम्म लाग्छ । हामीले सम्मान गरेको नेताहरुको अभिव्यक्ति यस्तो हुन्छ ? सत्यपरक हुनुपर्दैन । तथ्यहिन कुरा रोष्ट्रममा बोल्ने ? म यो कुरा प्रमाणित गरिदिनुभयो भने म उहाँको पछाडि खुरुखुरु झोला बोक्न तयार छु । कति बर्ष भन्नुहुन्छ त्यतिबर्ष, पहिले पहिले दास भन्थे। दाष होइन कि तर हिँड्न तयार छु । केही माननियहरुले राजीनामाको कुरा गर्नुहुन्छ। राष्ट्रियसभामा पनि भन्नुभयो। प्रमाणित गरेर देखाउँनुस् त सांसद पदबाट पनि राजीनामा दिएर तपाईंको पछाडि झोला बोकेर हिँड्न तयार छु । आरोप लगाउने ?’

उनले सत्ता छाड्नेबित्तिकै एकले अर्कालाई आरोप लगाएर मुलुक कहाँ पुर्याउँने भन्दै प्रश्न गरे ।

क्याटेगोरी : समाचार
ट्याग : #अराजक गतिविधि हेरेर बस्दैनौं, #ऊर्जामन्त्री भन्छन्- कुलमानले सरकारलाई टेरेनन्