कार्यपालिका बैठकमै वडाध्यक्षद्वारा शिक्षा प्रमुखमाथि हातपात, कर्मचारी आन्दोलित

साझा पाना २०८१ फागुन ५ गते १६:१८ मा प्रकाशित

रुपन्देही । रुपन्देहीको रोहिणी गाउँपालिकाका कार्यपालिका बैठकमै वडाध्यक्षले शिक्षा शाखा प्रमुखमाथि हातपात गरेका छन् । घटनाकाे विराेधमा सबै कर्मचारी आन्दोलनमा उत्रिएका छन् ।

शिक्षा, युवा तथा खेलकुद शाखाका प्रमुख मधुप्रसाद घिमिरेमाथि वडा नं २ का अध्यक्ष करम हुसेन खानले हातपात गरेकाे कर्मचारीहरुकाे भनाइ छ । गाउँपालिकामा कार्यरत कर्मचारीहरुले विज्ञप्ति जारी गर्दै दोषीमाथि कारबाही नहुँदासम्म काममा नफर्कने बताएका छन् ।

विज्ञप्तिमा भनिएको छ, ‘आज मिति २०८१/११/५ गते दिउँसो १२ः१५ बजे यस रोहिणी गाउँपालिका रुपन्देहीको कार्यालयमा कार्यपालिका बैठक सञ्चालन भइरहेको अवस्थामा शिक्षा, युवा तथा खेलकुद शाखाका प्रमुख मधुप्रसाद घिमिरेलाई आमन्त्रित गरी बैठकमा सहभागिता जनाउनुभएको हो । निज वडाअध्यक्ष करम हुसेन खानले बारम्बार कर्मचारीहरुलाई गालीगलौज गर्ने र शाखामा तालाबन्दी समेत गर्ने गरेको, कर्मचारीमाथि अप्रिय अपशब्द व्यक्त गर्ने र दादागिरी देखाउने कार्य गर्दै आएको अवस्था छ ।’

यस परिस्थितिमा कुनै राष्ट्रसेवक कर्मचारीको मानमर्दन गर्ने कार्यले अत्यन्तै मर्माहत बनाएको विज्ञप्तिमा उल्लेख छ ।

‘कार्यालय समयमै कर्मचारीहरुमाथि आक्रमण हुनु अत्यन्तै खेदजनक कार्य हो, सम्पूर्ण गाउँपालिकाका कर्मचारीहरु यस निदनीय कार्यको घोर भत्र्सना गर्दछौं,’ विज्ञप्तीमा भनिएको छ ।

कर्मचारीहरुले घटनाको दोषीउपर कडा कारवाही गरी गाउँपालिकामा भयरहित र स्वतन्त्र ढंगले कार्यालयका कामहरु सञ्चालन गर्ने वातावरण नबनेसम्म गाउँपालिकाबाट प्रवाह हुने सम्पूर्ण सेवाहरु बन्द गर्ने निर्णय गरेको जनाएका छन् । ‘यसबाट सेवाग्राहीमा पर्न गएको असुविधाप्रति क्षमाप्रार्थी छौं’, विज्ञप्तीमा उल्लेख छ ।

तर वडाध्यक्ष हुसेनले शिक्षा समितिका विषयमा कुरा उठेपछि सामान्य धकेलाधकेल भएको दावी गरे ।

‘सामान्य घटना हो, मेयरको दवावमा बढी चर्चा गराइएको हो । केही बढी बोलियो होला तर पहिले उहाँले बोतल उठाएपछि मैले थकेलेको हो । सबै सिसिटिभीमा हेर्न सकिन्छ नि’ उनले भने ।

हुसेनले थपे, ‘शिक्षा समितिको म्याद सकिए पनि गठनको लागि बोलाउनुभएन । आफैं गठन गर्नुभएको रहेछ । छ महिनादेखि कार्यपालिका बैठक बसेन । आज बसेको थियो । बैठकमा पालिका अध्यक्षले शिक्षा समितिमा कुरा उठाउनुभयो । तर मैले शिक्षा समितिमा भएको अनियमितताबारे कुरा उठाएको हुँ । बिद्यालय निरिक्षकले ममाथि आरोप लगाउनु भएर विवाद बढेको हो,’ उनले भने ।

उनले घिमिरेले मधु घिमिरे पालिकामा आएपछि शिक्षा क्षेत्रमा अनियमितता बढेको र आफूहरुले यस विषयमा प्रष्ट नहुँदासम्म आफूहरुले पनि शिक्षा समितिमा तालाबन्दी गरिएको बताए ।