बच्चा जन्माउन अमेरिका जानेहरुलाई ट्रम्पको नयाँ नीतिले कस्तो असर गर्ला ?

साझा पाना २०८१ माघ ८ गते १५:५९ मा प्रकाशित

काठमाडौं । अमेरिकाको भिजा लागेका नेपालका धेरै सेलिब्रेटीहरुहरुले अमेरिका पुग्दै बच्चा जन्माएका उदाहरण छन् । त्यसको एक उदाहरण हुन् रेखा थापा । यसै मुद्दामा थापा र राप्रपा अध्यक्ष राजेन्द्र लिङ्देनको सामाजिक संजालको ‘वाक युद्ध’का समाचार पनि बनेका थिए ।

यो नेपालीहरुमा मात्रै लागू भएको छैन । विश्वका अरु देशकाहरुले पनि बच्चालाई अमेरिकामा जन्माउने गरेको प्रचलन देखिन्छ । अमेरिका विश्वको सबैभन्दा सस्तो र राम्रो स्वाथ्य सेवा भएको मुलुक भएको कारणले मात्रै यस्तो भएको होइन । यसमा सिधासिधी चासो नवजात शिशुलाई अमेरिकी नागरिक बनाउनेमा देखिन्छ ।

अमेरिकामा जन्मेका नवजात शिशुहरु अमेरिकी नागरिक हुन पाउने कानूनी छिद्रमा टेकेर यसरी बच्चा जन्माउनेहरु धेरै छन् । र यसमै ट्रम्पको आपत्ति छ । उनको आपत्ति भाषणहरुमा मात्रै होइन राजनीतिक मुद्दाकै रुपमा आएको छ । अमेरिकाको सीमा क्षेत्रबाट छिरेका गैरकानूनी आप्रवासीहरु मात्रै नभएर अमेरिकाको भिजा लाएर अमेरिका पुगेर बच्चा जन्माउँदै अमेरिकी नागरिक बनाउने प्रचलनको ट्रम्पले विरोध गर्दै आएका छन् ।

सोमबार अमेरिकाको ४७ औं राष्ट्रपतिमा सपथप्रहण लिएर कार्यभार सम्हालेका ट्रम्पले यो मुद्दा फेरि उचाले । बेलायती विश्व च्यानल बीबीसीका अनुसार सीमामा संकटकाल लगाएका छन् भने जन्मनासाथ अमेरिकी नागरिकता पाउने प्रावधान अन्त्य गर्ने बताएका छन् ।

तर, यसो गर्नमा उनलाई कानूनी अड्चन आउने बताइन्छ । संविधान नै संशोधन गरेर गैरअमेरिकी नागरिकहरुबाट अमेरिकामा जन्मेका सन्तानले नागरिकता लिन पाउने प्रावधान हटाउनुपर्ने हुन्छ । दुवै सदनमा बुहत सांसद भएको रिपब्लिकन पार्टीका शक्तिशाली राष्ट्रपति भएका ट्रम्पले संविधान संशोधन गरेर पनि यो प्रावधान राख्नेमा पहल गर्न सक्छन् ।

अमेरिकाको दुई सदनका कूल सांसद ५३५ रहेका छन् । जसमा सन् २०२४ को चुनावी परिणाम अनुसार तल्ल्लो सदन हाउस अफ रेप्रिजेन्टेटिभमा ४३५ छन् जसमा रिपब्लिकन पार्टीका बहुमत २२० सांसद छन् र माथिल्लो सदन सिनेटमा १०० जना रहेकोमा रिपब्लिकन पार्टीका मात्रै बहुमत ५३ सांसद छन् ।

के हो अमेरिकाको जन्मसिद्ध नागरिकता प्रावधान रु

अमेरिकामा जन्मेका जो कोहिले अमेरिकी नागरिकता पाउन सक्छन् । यो कानूनमा मात्रै होइन संविधानमै टेकेर बनाइएको प्रावधान हो । जुनसुकै देश वा समुदायका भएता पनि अमेरिकामा जन्मेको बच्चा अमेरिकी नागरिक हुने प्रावधान छ ।

१५७ वर्ष अगाडि सन् १८६८ मा प्रमाणिकरण भएको अमेरिकी संविधानको १४ औं संशोधनमा यस्तो प्रावधान राखिएको छ । अमेरिकी संविधान बेत्ताहरुले तत्कालीन प्रावधान हुनुमा अमेरिकाका भर्खरै मुक्त भएका दाशहरुका सन्तालाई अमेरिकी नागरिक बनाउनको लागि ल्याइएको संशोधन भनेर व्याख्या गरेका छन् ।

खासगरी अफ्रिकी अमेरिकीहरुलाई लक्षित गरेर यो संसोधन आएको बताइन्छ । तर, अमेरिकी संविधानको १५ औं संशोधनले अमेरिकामा रहेका जुनसुकै पृष्ठभूमिका भएता पनि अमेरिकामा जन्मेको खण्डमा अमेरिकी नागरिकता पाउने अधिकार प्रत्याभूति गरिएको टाइम म्यागाजिनले उल्लेख गरेको छ ।

यही संवैधानिक आडमा अमेरिकामा बच्चा जन्माउँदा पाउने जन्मशिद्ध अधिकार कायम भएको छ । त्यसकै प्रयोग गरेर अमेरिकामा बच्चा जन्माउँदै नागरिकता दिलाउने सहज बाटो दिन लागेका देखिन्छन् अमेरिकाको भिजा लागेकाहरु ।

क्याटेगोरी : अन्तर्राष्ट्रिय
ट्याग : #बच्चा जन्माउन अमेरिका जानेहरुलाई ट्रम्पको नयाँ नीतिले कस्तो असर गर्ला ?