काठमाडौं, १३ फागुन । नेकपा एकीकृत समाजवादीका सम्मानित नेता एवम् पूर्वप्रधानमन्त्री झलनाथ खनालले यो गठबन्धन पनि दीगो हुनेमा शंका व्यक्त गरेका छन् ।

बङ्गलादेशको तीनदिने भ्रमण सकेर फर्किने क्रममा आज त्रिभुवन विमानस्थलमा पत्रकारसँग नेता खनालले निर्वाचन भएको तीन महिनामा तीनवटा गठबन्धन बनेको भन्दै यो गठबन्धनको आयु पनि दीगो नहुने टिप्पणी गरेका हुन् ।

उनले भने, ‘निर्वाचन भएको तीन महिनामा तीनवटा मात्रै गठबन्धन देखा परेका छन् । यो गठबन्धनको शृङ्खला आगामी पाँच वर्षमा हामीले धेरै देख्न पाउने छाँै । त्यसैले यो तेस्रो गठबन्धन मात्रै हो । त्यसैले यी गठबन्धनबाट देशले धेरै ठूलो पाउनेछ भन्नेमा मलाई विश्वास छैन ।’

उनले अहिलेको जस्तो संसदमा गठबन्धनको आयु लामो नहुने भन्दै यो गठबन्धनलाई पनि भ्यागुताको धार्नीको संज्ञा दिए । उनले भने, ‘त्रिशंकू संसदमा कुनै पनि गठबन्धनको आयु लामो हुँदैन । त्यसैले सामान्यत त्रिशंकू संसदका गठबन्धन भ्यागुताको धार्नी मात्रै हुन् त्यसैले दीगो हुन्छ भन्ने कुनै पनि ग्यारेन्टी छैन् ।’

क्याटेगोरी : समाचार
ट्याग : #breaking, #झलनाथ खनाल

---

---

---