भिक्षु अश्वघोष महास्थविरलाई विशेष राष्ट्रिय सम्मानका साथ अन्त्येष्टि गरिने

साझा पाना २०७५ चैत्र २४ गते १२:०१ मा प्रकाशित

काठमाडाैँ, २४ चैत । भिक्षु अश्वघोष महास्थविरलाई विशेष राष्ट्रिय सम्मानका साथ अन्त्येष्टि गरिने भएको छ ।

मन्त्रिपरिषद्को आइतबार बसेको आकस्मिक बैठकले भिक्षु अश्वघोष महास्थविरलाई विशेष राष्ट्रिय सम्मानका साथ अन्त्येष्टि गर्ने निर्णय गरेको हो ।

भिक्षु अश्वघोष महास्थविरको शुक्रबार निधन भएको थियो । रक्तचाप कम, मृर्गौला र मुटुमा समस्या र कलेजोमा पानी जम्ने समस्या देखिएको र उपचारकै क्रममा उनको निधन भएको थियो ।

भिक्षु अश्वघोषलाई प्रगतिशील र सक्रिय भिक्षुको रुपमा चिनिन्छ । चिनियाँ कम्युनिष्ट नेता माओत्सेतुङसंगको भेटबाट प्रभावित भएका भिक्षु २०४७ सालदेखि २०४९ सालसम्म राष्ट्रियसभाका सदस्य थिए ।

राष्ट्रिय जीवनमा महत्वपूर्ण योगदान पुर्‍याएका व्यक्तिको रुपमा तत्कालीन नेकपा एमालेले उनलाई राष्ट्रियसभा सदस्य बनाएको थियो ।

२०५१ सालमा भिक्षु अश्वघोष लुम्बिनी विकास कोषका उपाध्यक्ष भई काम गरेका थिए । भिक्षुका करिब डेढ सय पुस्तक प्रकाशित भइसकेको छ । भिक्षु संघको तालिमको अवधारणा भित्र्याउने श्रेय पनि यीनैलाई जान्छ ।

क्याटेगोरी : समाचार
ट्याग : #भिक्षु अश्वघोष