धादिङमा गठबन्धनलाई झड्का, धादिङ- २ को प्रदेश (२) मा राप्रपाका डम्बर तामाङ विजयी

साझा पाना २०७९ मंसीर ८ गते १६:३७ मा प्रकाशित

धादिङ । धादिङ प्रतिनिधिसभा क्षेत्र नम्बर २ को प्रदेशसभा २ मा राप्रपाका डम्बर तामाङ विजयी भएका छन् ।

नेकपा एमालेसंग तालमेल गरेर चुनाव लडेका तामाङ्ले सत्ता गठबन्धनका साझा उम्मेदवार नेकपा माओवादी केन्द्रका जगत सिंखडालाई एक सय ३१ मतले पछि पार्दै विजयी भएका हुन् ।

प्रारम्भिक मत परिणाम अनुसार राप्रपाका तामाङले १४ हजार चार सय ८१ मत पाएका छन् । उनका निकटम प्रतिद्वन्दी सिंखडाले १४ हजार तीन सय ५० मत ल्याए ।

राप्रपाले आफ्नो पकड मान्दै आएको यो प्रदेशमा नेपाली कांग्रेस, नेकपा एकीकृत समाजवादीको साथ लिएर चुनावी मैदानमा होमिएका माओवादी केन्द्रका सिंखडालाई गठबन्धनभित्रैका पार्टीका कार्यकर्ताले धोका दिएको समर्थकहरुले प्रतिक्रिया दिएका छन् । गठबन्धनप्रती असन्तुष्ट रहेका कांग्रेसका कार्यकर्ताहरुले पनि सामाजिक संजालमा आक्रोश पोखेका छन् ।

क्याटेगोरी : समाचार
ट्याग : ##धादिङ, #डम्बर तामाङ