४ वर्षीया बालिकाको बलात्कारपछि हत्या

साझा पाना २०७९ साउन ९ गते १४:०९ मा प्रकाशित

वीरगञ्ज महानगरपालिका–२ छपकैयाँकी ४ वर्षीया बालिका साउन ५ गतेदेखि नै हराइरहेकी थिइन् । बेलुका ७ बजेसम्म घर नआएपछि परिवारले खोजी सुरु गरे । अभिभावकले छरछिमेक, साथीभाइ र आफन्त सबैसँग सोधखोज गरे । तर उनी फेला परिनन् ।

भोलिपल्ट साउन ६ गते शुक्रबार हजुरबुबा मो.मैनुदिन मिया ठकुराईले नातिनी हराएकाले खोजी दिन आग्रह गर्दै प्रहरीमा निवेदन दिए । प्रहरीले खोजी गर्दै थियो । छिमेककै अन्दाजी १२ वर्षीय बालकले बालिकाको शव झाडीमा रहेको भनी अभिभावकलाई खबर गरे । साउन ७ गते बिहान वीरगञ्ज–२ छपकैयास्थित खाली जग्गाको झाडीमा विभत्स अवस्थामा बालिका मृत भेटिइन् । अभिभावकहरुले शव उठाएर घरमा ल्याए ।

मैनुदिन भन्छन्, ‘नातिनीको खोजतलास र चिन्ताले राति अबेरसम्म निद्रा परिरहेको थिएन, बिहान म सुतेकै थिएँ, छिमेककै १२ वर्षीय किशोरले नातिनीको शव झाडीमा छ भनेको रहेछ । बुहारीसहित घरका सदस्य सबै दौडदै घटनास्थल पुगेछन् । शव उठाएर ल्याएछन् ।’ घरका सदस्यहरुले शव घरमा ल्याइसकेपछि बिहान ७ बजेतिर मात्रै प्रहरीले शव भेटिएको खबर पाएको थियो । त्यसपछि वडा प्रहरी कार्यालय विर्ताका प्रहरी निरीक्षक विशाल मल्ल सहितको टोली घटनास्थल अनुसन्धानका लागि पुग्यो ।

क्याटेगोरी : अपराध/सुरक्षा, समाचार
ट्याग : #४ वर्षीया बालिकाको बलात्कारपछि हत्या, #बलात्कार