काठमाडौँ। अख्तियार दुरुपयोग अनुसन्धान आयोगले पूर्व नायब सुब्बा भीमकान्त भण्डारीविरुद्ध करिब सवा ६ करोडको भ्रष्टचार मुद्दा दायर गरेको छ ।

आयोगले भण्डारीले पदमा रहँदा अकुत सम्पत्ति हासिल गरेको भन्दै काठमाडौँ विशेष अदलतमा शुक्रबार मुद्दा दायर गरेको हो ।

तिनै भण्डारीको नेकपा माओवादी केन्द्रबाट मन्त्री बनेका नेताहरुसँग कनेक्सन रहेको खुलेको छ ।

यसरी हेर्दा उनले तीन नेताहरुकै आडमा करोडौँको अकुत सम्पत्ति कमाएको देखिएको छ ।

भण्डारीले त्यसरी गैरकानुनी रुपमा कमाएको सम्पत्तिबारे खुलेसँगै माओवादी नेताहरको कनेक्सन छताछुल्ल भएको छ ।

स्थानीय विकास प्रशिक्षण प्रतिष्ठान कलवलगुडी झापाका तत्कालीन वरिष्ठ व्यवस्थापन सहायक (नायब सुब्बा) भण्डारीले स्रोत नखुलेको ६ करोड २४ लाख रुपैयाँ सम्पत्ति देखिएको थियो ।

अख्तियारको अनुसन्धानअनुसार भण्डारीले २१ असोज २०७३ सालदेखि २०७८ साल पुस मसान्तसम्म ६ करोड २४ लाख ४ हजार ६ रुपैयाँ अकुत सम्पत्ति कमाएको पाइएको छ ।

चार वर्षको सरकारी जागिरको समयमा भण्डारी माओवादी केन्द्रबाट विभिन्न समयमा मन्त्री भएका वर्षमान पुन, कृष्णबहादुर महरा, आशा कोइराला र हितराज पाण्डेको स्वकीय सचिवका रूपमा काम गरेका थिए ।

वरिष्ठ व्यवस्थापन सहायक पदबाट भण्डारी २१ असोज २०७३ सालमा राजपत्र अंकित प्रथम श्रेणीअन्तर्गत सार्वजनिक सेवामा प्रवेश गरेका थिए । उनले २०७७ साउनमा स्वेच्छिक अवकाश लिएका थिए ।

भण्डारी चार वर्ष मात्रै निजामती सेवामा रहँदा ६ करोड २४ लाख ४ हजार ६ रुपैयाँ अकूत सम्पत्ति आर्जन गरेका हुन् । अख्तियारले सो सम्पत्ति जफतको माग गर्दै मुद्दा दायर गरेको हो ।

भण्डारीमाथि भ्रष्टाचार निवारण ऐन, २०५९ को दफा २० को उपदफा २ बमोजिम कैद एवं बिगोबमोजिम जरिमाना गर्न र स्रोत नखुलेको सम्पत्ति जफत गर्न माग गरिएको अख्तियारका प्रवक्ता श्याम भण्डारीले जनाएका छन् ।

अख्तियारका अनुसार नासू भण्डारीले विभिन्न समयमा चार जना मन्त्रीको स्वकिय सचिव बसेकै बेला अकूत सम्पति आर्जन गरेको पाइएको छ ।

उनी स्थानीय विकास प्रशिक्षण प्रतिष्ठान कलवलगुडी झापामा कार्यरत रहे पनि जागिरको धेरै समय मन्त्रीको स्वकीय सचिवकै रूपमा सिंहदरबारमा बिताएका थिए ।

भण्डारीलाई काजका रुपमा सिंहदरबार ल्याइएको खुलेको हो । त्यही समय नै भण्डारीका लागि अकूत सम्पति आर्जन गर्ने सुनौलो अवसर बनेको खुल्न आएको छ ।

उनी स्वकीय सचिव हुँदा नै विचौलिय तथा ठेक्काका विषयमा सेटिङ गरेर अकुत सम्पत्ति हासिल गरेको खुलेको छ ।

माओवादी केन्द्रका चार मन्त्रीको स्वकीय सचिव रहँदा अकुत सम्पति आर्जन गर्न सफल भएपछि ती नायब सुब्बाले जागिर खाएको चार वर्षमा नै राजीनामा दिएर व्यापार गर्न थालेका समेत तथ्य उजागार भएको छ ।

उनले ललितपुर कुपण्डोलमा विध ल्याब खोलेर मेडिकल व्यापार गर्दै आइरहेका थिए । ठूलाठूला व्यापारीसँग कनेक्सन रहेको उनलाई माओवादीभित्र सेटिङ मिलाउने खेलाडीका रुपमा चिनिन्छन् ।

क्याटेगोरी : समाचार
ट्याग : #hot, #अख्तियार दुरुपयोग अनुसन्धान आयोग, #भ्रष्टचार

---

---

---