तनहुँका एसपी राजेन्द्रबाबु रेग्मी गण्डकी प्रदेश प्रहरी कार्यालयबाट पुरस्कृत

प्रदेश प्रहरी कार्यालयका (डिआइजी) दिवेश लोहनीले पुरस्कृत भएका प्रहरी प्रमुख रेग्मीले आफूलाई सुम्पिएको जिम्मेवारीलाई अत्यन्तै इमान्दारी, बफादार भई उत्कृष्ट ढंगबाट कार्यसम्पादन गरेको पाइएको हुँदा अभिलेख किताबमा जनिने गरी नगद १५ सय रुपैयाँ सहित पुरस्कृत गरिएको बताए ।

प्रदेश प्रहरी कार्यालयले उनलाई पुरस्कृत गर्दा मनोबल उच्च रहने र अन्य प्रहरी कर्मचारीहरुमा समेत सकारात्मक प्रभाव पर्न गइ कार्यसम्पादनमा अझै बढी प्रभावकारीता आउने देखिएकोले कार्यसम्पादनको कदरस्वरुप प्रहरी नियमावली २०७१ (संशोधन सहित) को परिच्छेद १५ को नियम १९७ को देहाय (ख) बमोजिम पुरस्कृत गरिएको जनाएको छ ।

अपराध नियन्त्रणमा कठोर रूपमा उत्रिने एसपी रेग्मीले मंसिर ९ गतेदेखि तनहुँ प्रहरी प्रमुखको रूपमा जिम्मेवारी सम्हाल्न पाएका थिए । ६ महिनाको अवधीमा उनलेे शान्तिसुरक्षा नियन्त्रण र अपराध सुरक्षामा कसैसँग सौदाबाजी गरेनन् ।

विभिन्न घटनमा संलग्न व्यक्तिहरुलाई तत्काल कार्वाहीको दायरा ल्याउन महत्वपूर्ण भूमिका निर्वाह गरेका उनलेे तनहुँ व्यास नगरपालिका ११ स्थित रानी गाउँमा भएको हत्याकाण्डमा संलग्न रहेका अभियुक्तलाई २४ घण्टाको अवधिमा पक्राउ, अभिनेता पल शाह पक्राउका क्रममा निम्तिएको असहज परिस्थितिलाई काबुमा राखी सुरक्षालाइ नियन्त्रणमा लिन महत्वपूर्ण भूमिका निर्वाह गरेका थिए ।