अर्जुन बाबुले ल्याए ‘जय जय राधे’

साझा पाना २०७८ असोज १८ गते २०:१८ मा प्रकाशित

– जीवनराज दाहाल (बर्दिवास)

लामो समयदेखि शास्त्रीय सङ्गीतको क्षेत्रमा क्रियाशिल बर्दिवास महोत्तरी निवासी अर्जुन बाबु लामाले आफ्नो भजन गीत “जय जय राधे” को अडियो भिडियो भर्खरै मात्र आफ्नै युट्युब च्यानल मार्फत सार्वजनिक गरेका छन् ।

विष्णु देवको शब्द रहेको उक्त भजनलाई अर्जुन बाबुले नै स्वर र सङ्गीत भरेका हुन् । अर्जुनलाई कोरसमा गंगा खतिवडा, अम्बिका राउत ‘बुनु’, सरला थापा, इन्दिरा गिरी, उषा निरौला, अचल ब. केसी, करन मुखियाले साथ दिएका छन् । शशी बिक्रम थापाको निर्देशनमा बनेको उक्त भिडियोमा अर्जुन बाबु, बालकलाकार आवाज थापा, कृष्मा खड्का, इशु दाहाल लगायत एकदर्जन जति कलाकारले अभिनय गरेका छन् ।

सङ्गीतका धेरै प्रशिक्षकहरू जन्माइरहेका अर्जुनले आफ्नो सङ्गीतको यात्रा भने चण्डी काफ्लेबाट सुरु गरेका थिए । पहिलेपनि तामाङ गीत, आधुनिक गीत र गजल गीत आफ्नो स्वरमा रेकर्ड गराइसकेका लामा आफ्नो जीवनको अन्तिम अवस्था सम्मपनि शास्त्रीय सङ्गीतमै आफूलाई समर्पित गर्न चाहन्छन् । शास्त्रीय सङ्गीतसँगै अध्यात्मिक जीवन रुचाउने लामा एक कुशल समाजसेवी पनि हुन् ।