सङ्खुवासभा- खाँदबारी नगरपालिकाको ३ न. वडाले कृषकलाई आधुनिक हलो वितरण गरेको छ।

परम्परागत कृषि पेसालाई व्यवसायिक र आधुनिकीकरण बनाउन ३ न. वडा मानेभञ्ज्याङले कृषकलाई १० वटा आधुनिक हलो (मिनीटिलर) उपलब्ध गराएको हो । ३ न. वडाले कृषकलाई अनुदानमा आधुनिक हलो वितरण गरेको ३ न. वडाको अध्यक्ष भरत कुमार घिमिरेले बताउनुभयो ।

श्रम र समयको बचत, सीमित जनशक्तिबाट पर्याप्त काम हुने भएपछि किसान हाते ट्याक्टरको प्रयोगतर्फ आकर्षित भएका छन् । किसानले राज्यले गरेको लगानी खेर नफाली उत्पादनमा वृद्धि गर्दै बढी भन्दा बढी मात्रामा आर्थिक उपार्जन तर्फ लाग्न वडा अध्यक्ष घिमिरेले आग्रह गर्नुभयो ।

वडा भित्रका किसानलाई व्यवसायिक कृषि प्रणालीको शुरुवात गर्न ५० प्रतिशत अनुदानमा मिनीटिलर उपलब्ध गराएको ३ न. वडाले जनाएको छ । प्रतिगोटा ५४ हजार ८ सय रुपैया मूल्य पर्ने मिनीटिलर वडाको ५० प्रतिशत अनुदानमा वितरण गरेको अध्यक्ष घिमिरेले बताउनुभयो ।

आधुनिक हलो पाएपछि गोरुलाई घाँसपात गर्ने समयको बचतले कृषि पेसामा सहज हुने खाँदबारी -३ का कृषक रुकमणि गुरुङले बताउनुभयो । पहिलो पटक खाँदबारी नगरपालिकामा वडाको आन्तरिक बजेट मार्फत अनुदानमा किसानलाई मिनिटिलर वितरण गरिएको हो ।

क्याटेगोरी : फोटो फिचर, समाचार, स्थानीय
ट्याग : #खाँदबारी नगरपालिका, #भरत कुमार धिमिरे, #संखुवासभा

---

---

---