मानसरोवरका लागि अाठ हेलिकप्टर कम्पनीका ११ उडान

साझा पाना २०७५ असार ८ गते ०८:३१ मा प्रकाशित

तिब्बतको मानसरोवर पुग्न अघिल्लो वर्षभन्दा कम यात्रु भएपनि यस वर्ष आठ हेलिकप्टर कम्पनीका १० ओटा हेलिकप्टर एक महिनाका लागि हुम्लाको सिमीकोटमा नै आधार क्षेत्र बनाउने भएका छन् ।

बढी मात्रामा भारतीय पर्यटक आउने सो क्षेत्रमा गत वर्षभन्दा यस पटक यात्रु कम आउँदा उडानको चाप कम भएपनि चहलपहल भने उस्तै रहेको हेलिकप्टर कम्पनीहरुले जनाएका छन् ।

कैलाश दर्शन गरे स्वर्ग गइन्छ भन्ने जनविश्वासका साथ मानसरोवरमा हिन्दू धार्मिक पर्यटकहरु बढी आउने गर्छन् । हिन्दू र बौद्ध धर्मावलम्बीहरुको पवित्रस्थलका रुपमा रहेको मानसरोवर, पर्यटकीय गन्तव्य पनि रहेकाले अन्य मुलुकबाट पनि पुग्ने क्रम बढ्दो छ ।

‘अहिलेसम्म अघिल्लो वर्षभन्दा कम बुकिङ भएको छ,’ माउन्टेन हेलिकप्टर प्रालिका महाप्रबन्धक दिल ओलीले भने । तर, सिमीकोटदेखि नेपाल चीन सिमाना हिल्सासम्म यात्रुहरु हेलिकप्टरमार्फत नै जाने भएकाले ८ हेलिकप्टर कम्पनीले सेवा दिइरहेको उनले बताए ।

मानसरोवर जाने मुख्य सिजन जेठ र असार हो । सो क्षेत्रमा जान अहिले दिनहुँ हेलिकप्टर चार्टर हुने गरेका छन् । छिटो पुग्न लाखौं रुपैयाँ खर्च गरेर हेलिकप्टरमार्फत जाने तीर्थ यात्रीको सङ्ख्यामा वृद्धि भएको छ ।

सिमीकोटबाट नेपाल र चीनको हिल्सा नाकासम्म हेलिकोप्टरमा जान सकिन्छ । मानसरोवर जाने तीर्थयात्रीलाई नै लक्ष्य गरी धेरै हेलिकप्टर कम्पनीहरु अहिले सिमीकोट एयरपोर्टमा पुगेका छन् । राजधानीको व्यापार छोडेर आठ ओटा हेलिकप्टर कम्पनी यति बेला मानसरोवरको यात्रामा छन् ।

क्याटेगोरी : पर्यटन
ट्याग : #मानसरोवर